Трамп бекор айтибди, Ҳурмуз АҚШ ҳудуди эмас – Эрон

Эрон Ташқи ишлар вазири ўринбосари Қозим Ғарибободий 15 август куни Ҳурмуз бўғози очилиши ёки ёпилиши бўйича қарорни фақат Эрон қабул қилишини билдирди. Бу ҳақда Reuters хабар берди.

Унинг таъкидлашича, Теҳрон АҚШнинг таҳдидлари ёки куч намойиши таъсирида ўз позициясини ўзгартирмайди.

«Ҳурмуз бўғозини твит ёки авианосец билан эгаллаб бўлмайди», — деди Ғарибободий.

Бундан аввал Трамп Эрон устидан «ғалаба» қозонилгандан сўнг Ҳурмуз бўғозини АҚШ ҳудуди деб эълон қилишини айтган эди.

Эрон АҚШ билан музокараларни қайта бошлайдими?

Эрон ташқи ишлар вазири Аббос Ароқчининг билдиришича, Теҳрон ҳозирча АҚШ билан музокараларни қайта бошлаш бўйича қарор қабул қилмаган.

Унинг айтишича, Қатар ва Покистон орқали АҚШ билан хабар алмашиш давом этмоқда, аммо бу жараённи ҳали тўлиқ музокаралар деб бўлмайди.

Ароқчи, шунингдек, Ҳурмуз орқали кемалар ҳаракатини қайта тиклаш учун АҚШ аввал келишилган шартларни бажариши кераклигини таъкидлаган.

Айни пайтда Ҳурмуз бўғозидаги ҳаракат кескин камайган. Reuters маълумотига кўра, 14 август куни бўғоз орқали атиги икки кема ўтган ва уларнинг ҳеч бири хом нефть ташимаган.