АҚШ Нетаньяҳунинг “Ғазони тўлиқ эгаллаш режаси” борасида сукут сақламоқда

Давлат департаментидаги матбуот анжуманида идоранинг расмий вакили Тэмми Брюс Исроил режалари ва уларнинг АҚШ сиёсатига мослиги ҳақидаги саволларга жавоб беришдан тийилди.

«Исроил режалари ва ҳозирги хабарларга келсак, мен сизларни Исроил ҳукуматига мурожаат қилишга чорлайман. Биз хорижий ҳукуматларнинг баёнотларини изоҳламаймиз», — деди Брюс.

Журналист томонидан берилган Исроилнинг Ғазода ҳарбий ҳаракатларни янада кучайтириги АҚШ президенти Дональд Трампнинг урушни тугатишга қаратилган баёнотларига зид эмасми, деган саволга Брюс шундай жавоб берди:

«Мен Исроил режалари ҳақида гапирмайман. Ҳозир турли хабарлар тарқалмоқда. Мен бошқа ҳукуматларнинг ҳаракатларини муҳокама қилмайман. Айта оладиган ягона нарса шуки, Трамп маъмурияти бу масалада жуда жиддий ишламоқда. У (Трамп) урушни тугатишни истайди».

Бундан аввал Исроилнинг давлат телеканали бўлмиш KAN ўз манбаларига таяниб, Нетаньяҳу Ғазони тўлиқ эгаллаш режасини маъқуллаётганини хабар қилганди. Аммо канал маълумотига кўра, Исроил қуролли кучлари (ЦАХАЛ) бош штаби раҳбари Эял Замир бундай режага қарши чиққан.

Бунга жавобан Нетаньяҳу офиси Замирга шундай мазмунда жавоб қайтарган:

«Агар Ғазони тўлиқ оккупация қилиш режаси сизга мос келмаса, истеъфога чиқишингиз керак».