Ғазода кучли ёмғир 70 мингта чодирни сув остида қолдирди

Ғазо секторида 7 ноябрь куни кузатилган кучли ёмғир оқибатида кўчирилган аҳоли яшаб турган тахминан 70 мингта чодир сув остида қолди. Бу ҳақда Al Jazeera Ғазо ҳукумати Матбуот хизмати маълумотларига таяниб хабар берди.

Маълум қилинишича, мавсумнинг биринчи қишки бўрони бошланганидан кейин дастлабки 12 соат ичида кўплаб вақтинчалик бошпаналарни сув босган. Дастлабки зарар миқдори 3 миллион доллар атрофида баҳоланган. Шунингдек, ёмғир ва кучли шамол оқибатида ўнлаб шикастланган бино деворлари қулаб, одамлар жароҳатланган.

Фавқулодда хизматларга 1,5 мингта мурожаат келиб тушган

Ғазо Фуқаро мудофааси хизмати маълумотига кўра, ёмғир бошланганидан кейинги 10 соат ичида аҳолидан тахминан 1 500 та ёрдам сўрови келиб тушган.

Айрим вақтинчалик бошпана ҳудудларида сув сатҳи 30–40 сантиметрга кўтарилган. Натижада баъзи бошпана марказлари бутунлай сув остида қолган ва у ердаги одамлар бошқа жойга чиқиб кетишга мажбур бўлган.

Фуқаро мудофааси вакили Маҳмуд Басалнинг таъкидлашича, вазият айниқса чала туғилган чақалоқлар, кексалар ва беморлар учун хавфли. Унинг айтишича, хизмат ходимлари кўплаб оилаларга ёрдам беришда жиддий қийинчиликларга дуч келмоқда.

Секторда 200 мингта чодирга эҳтиёж бор

Ғазо фавқулодда вазиятлар қўмитаси маълумотларига кўра, ҳозирда бир миллиондан ортиқ кўчирилган аҳоли қиш мавсумини оғир шароитда ўтказиш хавфи остида. Ҳудудга зудлик билан тахминан 200 мингта чодир ва иситиш воситалари зарур.

Ғазо Фуқаро мудофааси раҳбари Раед ад-Даҳшон Al Jazeera'га берган интервьюсида хизмат ихтиёрида ҳатто битта ҳам чодир ёки сув ўтказмайдиган қоплама материали йўқлигини билдирган.

Фаластин нодавлат ташкилотлари тармоғи раҳбари Муҳаммад Салҳа эса Ғазога ҳар куни 180–200 та юк машинаси кириб келаётганини айтган. Унинг таъкидлашича, ўт очишни тўхтатиш бўйича келишувда кунига 600 та юк машинасини киритиш кўзда тутилган эди. Мавжуд оқимнинг фақат 40 таси атрофидагиси гуманитар ёрдам ташиган.

Касалхоналар фаолиятига ҳам зарар етди

Кучли ёмғир Ғазо секторидаги соғлиқни сақлаш муассасалари фаолиятига ҳам таъсир кўрсатди. Al Jazeera маълумотига кўра, Ғазо шаҳридаги Аш-Шифо тиббиёт мажмуасининг шошилинч ёрдам бўлими сув остида қолган ва тахминан тўрт соат давомида ишламаган.

Мутахассислар ёмғир сувларининг канализация оқовалари билан аралашиши натижасида ошқозон-ичак, нафас йўллари ва тери касалликлари кўпайиши мумкинлигидан огоҳлантирмоқда.

Фаластинлик гуманитар ташкилотлар бошпаналар учун зарур материаллар ва қурилиш техникасининг Ғазога киритилишидаги чекловлар вазиятни оғирлаштираётганини таъкидламоқда.

Шу тариқа, қишки ёмғир Ғазода уруш оқибатида уй-жойидан айрилган аҳолининг гуманитар аҳволини янада мураккаблаштирди. Бошпаналар, иситиш воситалари ва тиббий ёрдамга бўлган эҳтиёж ортиб бормоқда.

Муаллиф: Ҳасанбой ОЧУН