АҚШ ва Эрон Қатарда музокара ўтказади

Америка ОАВларининг АҚШ юқори мартабали мулозимларига таяниб хабар беришича, Қўшма Штатлар ва Эрон ҳарбий зарбаларни тўхтатишга келишиб олган ҳамда ўрталаридаги омонат тинчлик битимини сақлаб қолиш мақсадида 30 июнь куни Қатарда музокаралар ўтказади. Бу ҳақда Euronews ёзди.

Бу ютуққа бир неча кун давом этган ва кескинлашиб бораётган ҳарбий тўқнашувлардан сўнг эришилди.

Мазкур тўқнашувлар февраль ойи охирида бошланган зиддиятни тугатиш ва муҳим сув йўли орқали юк ташишни тиклашга оид 17 июнда имзоланган вақтинчалик англашув меморандумини хавф остига қўйганди.

Ушбу келишувга кўра, Теҳрон тижорат кемаларининг Ҳормуз бўғозидан хавфсиз ўтишини таъминлаш мажбуриятини олган, Вашингтон эса Эрон портлари блокадасини бекор қилишга кўнган.

“Ҳозирча кемалар эркин ўтолади”

“Биз барча кинетик ҳаракатларни тўхтатишга қарор қилдик”, — деган АҚШнинг юқори мартабали расмийси Axios нашрига берган интервьюсида ҳужумларга ишора қилувчи ҳарбий атамани қўллаб.

Бошқа бир америкалик расмий Axios нашрига иккала томон ҳам “ҳозирча” ҳарбий ҳаракатларни тўхтатишини ва музокаралар давом этиши кутилаётгани боис кемалар эркин ҳаракатлана олишини маълум қилди.

CNN телеканали Трамп маъмурияти расмийсининг шунга ўхшаш фикрларини келтириб, томонлар 30 июнь куни Доҳада навбатдаги муҳокамалар учун учрашишга келишганини тасдиқлади.

“Эрон йўқ бўлиб кетади”

Доналд Трамп Эроннинг кема қатновига ҳужумлари қайта тикланса, кенг кўламли ҳарбий чоралар кўрилиши ҳақидаги огоҳлантиришини яна бир бор такрорлади.

Унинг иддао қилишича, агар АҚШ урушни қайта бошлашга “мажбур бўлса”, Эрон “йўқ бўлиб кетади”.

Учрашув жойи ўзгартирилди

Дипломатик манбаларга кўра, сешанба кунги учрашув дастлаб кенгроқ масалаларни, жумладан, Эрон ядровий дастурини муҳокама қилишга қаратилган.

Бироқ, дам олиш кунлари ҳарбий тўқнашувлар кескинлашгани сабабли учрашув жойи Швейтсариядан Қатарга кўчирилиб, кун тартиби фақатгина Ҳормуз бўғозидаги зиддиятни ҳал этишга қаратилди.