Трамп Эронга қарши «иқтисодий уруш» бошланганини эълон қилди

АҚШ президенти Дональд Трамп Эронга қарши «иқтисодий уруш ва мисли кўрилмаган кўламдаги изоляция» бошланаётганини эълон қилди. Унинг айтишича, бу чоралар Теҳроннинг келишув тузиш имкониятидан фойдаланмагани сабабли қўлланмоқда.

Трамп ўзининг Truth Social ижтимоий тармоғида Эронга «ҳеч ким» ундан кўра яхшироқ келишув имкониятини таклиф қилмаганини, аммо Теҳрон бу имкониятдан фойдаланмаганини ёзди.

У янги чораларни «бирор давлатга нисбатан қўлланган энг вайронкор иқтисодий операция» деб атаган.

Эрон билан ҳамкорлик қилувчи давлатларга огоҳлантириш

Трамп нафақат Эроннинг ўзи, балки унга иқтисодий ёрдам беришда давом этадиган бошқа давлатларни ҳам огоҳлантирди.

Унинг таъкидлашича, агар бирор давлатнинг молиявий ташкилотлари, компаниялари, аэропортлари ёки давлат муассасалари Эронга қандайдир «ҳаёт чизиғи» тақдим этса, бу давлатнинг ўзи ҳам катта иқтисодий оқибатларга дуч келиши мумкин.

Трамп нефть контрабандаси, валюта операциялари, нақд пул ўтказмалари, айирбошлаш шохобчалари, кемаларни хорижий байроқ остида рўйхатдан ўтказиш ва сохта компаниялар орқали операцияларни тўхтатиш кераклигини айтган.

АҚШ президенти ўз ташаббусини «иқтисодий D-Day» деб атаган. Бу атама Иккинчи жаҳон уруши давридаги Нормандия десантига ишора бўлиб, уни ҳал қилувчи ҳарбий операция сифатида таърифлаган.

Трамп: Эрон «жуда оғир аҳволда»

Трампнинг баёнотида Эроннинг ҳарбий ва иқтисодий ҳолатига ҳам кескин баҳо берилган.

Унинг таъкидлашича, Эрон «жуда оғир аҳволда». Трамп Эрон ҳарбий-денгиз кучлари йўқ қилингани, ҳаво кучлари катта зарар кўргани, ҳарбий заводлар вайрон бўлгани ва миллий валютаси кескин қадрсизланганини айтди.

АҚШ президенти, шунингдек, Эрон ядровий қуролга эга бўлмаслигини яна бир бор таъкидлади.

Трампнинг янги баёноти АҚШ ва Эрон ўртасидаги кескинлик юқори даражада сақланиб қолаётган бир пайтга тўғри келмоқда. Вашингтон Теҳронга босимни нафақат ҳарбий, балки иқтисодий воситалар орқали ҳам кучайтиришга уринмоқда.