Трамп Конгрессга Эрон билан уруш қайта бошланганини билдирди

АҚШ президенти Доналд Трамп Конгрессга Эронга қарши ҳарбий ҳаракатлар 7 июль куни қайта бошланганини расман маълум қилди.

Маъмурият бу хатни Конгресс розилигисиз минтақада янги 60 кунлик ҳарбий урушни бошлаб берувчи ҳужжат сифатида баҳоламоқда.

10 июль санаси билан ёзилган ва Reuters кўрган мактубда Трамп шундай дейди:

“Мен ушбу ҳарбий ҳаракатга америкаликларни ҳамда АҚШнинг миллий хавфсизлиги ва ташқи сиёсий манфаатларини ҳимоя қилиш вазифасига мувофиқ равишда бошчилик қилдим”.

Мактубда Трампнинг ҳаракатлари, жумладан, 7 апрель куни эълон қилган ва кейинчалик узайтирилган икки ҳафталик сулҳ, шунингдек, можарони дипломатик йўл билан ҳал этишга қаратилган маъмурият саъй-ҳаракатлари баён этилган.

Шунингдек, АҚШ президенти 17 июнь куни Эрон билан имзолаган англашув меморандумини эслатиб, Эрон Ҳормуз бўғозида ҳаракатланаётган тижорат кемаларига ҳужум қилиш орқали ушбу келишувни бузганини айтган. Айнан шу ҳолат Ислом Республикасига қарши зарбаларни қайта бошлашга сабаб бўлган.

Уруш ваколатлари тўғрисидаги қонун

АҚШ Конституциясига кўра, уруш эълон қилиш ваколати президентга эмас, балки Конгрессга тегишли. Бироқ АҚШ президентлари мамлакат хавфсизлигини таъминлаш мақсадида Конгресс розилигисиз қисқа муддатли ҳарбий амалиётларни бошлаш ҳуқуқига эга эканини таъкидлаб келган.

“Ҳарбий ваколатлар тўғрисида”ги қонунга биноан, президент ҳарбий ҳаракатларни бошлаганидан сўнг 48 соат ичида Конгрессни хабардор қилиши шарт. Бундан ташқари, Конгресс рухсатисиз бошланган ҳарбий амалиётлар 60 кун ичида тўхтатилиши кераклиги белгиланган.

Эрон бўйича илк 60 кунлик муддат 1 майда тугаган эди. Бироқ республикачи президент сулҳ туфайли ҳарбий ҳаракатлар якунланганини эълон қилиб, бу муддат энди амал қилмаслигини таъкидлади. Ҳолбуки, шундан сўнг ҳам ҳужумлар давом этди ва АҚШ кучлари Эрон портларини қамал қилди.

Демократлар ва урушга қарши бўлган республикачилар маъмурият қонунни нотўғри талқин қилаётганини таъкидлади.

Вакиллар палатасидаги юқори мартабали демократ ёрдамчиси анонимлик шарти билан Reuters га шундай деди:

“Президентнинг ўзи тўрт-олти ҳафта давом этади деган уруш ойлаб чўзилиб кетганини шунчаки йўққа чиқара олмайди”.

“Ишимни қийинлаштиряпсиз”

Бундан ташқари, ўтган ой Сенат ва Вакиллар палатаси Трампдан АҚШ қўшинларини Эронга қарши ҳарбий ҳаракатлардан олиб чиқишни талаб қилувчи резолюцияни маъқуллади.

Трамп бунга кескин муносабат билдириб, резолюцияни қўллаб-қувватлаганларни Эронга “мадад бераётганликда” ва унинг ишини “янада қийинлаштираётганликда” айблади.