Ўзбекистонда 16 ёшгача бўлган болалар учун ижтимоий тармоқлар чекланиши мумкин

Бу ҳақда Мактабгача ва мактаб таълими вазири Эъзозхон Каримова маълум қилди.

Унинг сўзларига кўра, мазкур масала бўйича қонун лойиҳаси ишлаб чиқилиб, жамоатчилик муҳокамасига қўйилиши режалаштирилган.

«Ҳозир техника асри, болаларимиздан телефонларни юлиб ололмаймиз. Албатта, телефон керак. Аммо ундан фойдаланиш маданияти ва меъёри ҳам бўлиши зарур. Ўқувчининг мактабга киришдан олдин телефонини қолдиришига оид буйруқ чиққан ва одоб-ахлоқ қоидалари ҳам мавжуд. Лекин бу қоидалар қаердадир ишлайди, қаердадир эса ишламайди. Буни эндиликда қаттиқ назоратга олиб, 16 ёшгача бўлган болаларимизнинг ижтимоий тармоқлардан фойдаланишини қонун билан чекламоқчимиз», — деди Эъзозхон Каримова.

Вазирнинг таъкидлашича, асосий мақсад болаларнинг телефондан эмас, балки ижтимоий тармоқлардан фойдаланишини тартибга солиш ва рақамли хавфсизликни таъминлашдан иборат.