Avstraliyada ijtimoiy tarmoqlarga qöyilgan taqiq foyda bermayapti

Hukumatning 16 yoşgaça bölganlar uçun platformalarni taqiqlovçi qarori kuçga kirganidan uç oy ötib ham, har 10 nafar avstraliyalik ösmirdan 8 nafardan ortiği ijtimoiy tarmoqlardan foydalanişda davom etgan. Bunga sabab –texnologiya kompaniyalari yoşni samarali tekşiriş tizimini joriy qila olmagani.

31-iyul kuni e’lon qilingan tadqiqotda eSafety taşkiloti aniqlaşiça, 10 – 15 yoşli bolalarning aksariyati mart oyida ham ijtimoiy tarmoqlardan 2025-yil 10-dekabrda taqiq kuçga kirişidan avval qanday bölsa, şunday foydalangan. Şuningdek, ota-onalarning farzandlarining bu xatti-harakatidan boxabarligi kamaygan.

Avstraliya ijtimoiy tarmoqlarning ösmirlar salomatligiga ta’siri borasidagi xavotirlar tufayli dunyoda birinçi bölib taqiq joriy qildi. Öşandan beri xuddi şu çeklovni joriy etişni körib çiqayotgan davlatlar ham mamlakatdagi taqiqning amalga oşiriliş jarayonini diqqat bilan kuzatmoqda.

Ösmirlar orasida sörov

Taqiqdan oldin sörovda qatnaşgan bolalarning qariyb 86 foizi kamida bitta yoş çeklangan platformadan foydalanişini aytgan. Ammo uç oy ötib ham bu körsatkiç 81 foizdan yuqoriligiça qolgan.

Ösmirlarning qariyb 58 foizi ijtimoiy tarmoqlardan har kuni yoki tez-tez foydalanişini aytgan, bu taqiqdan avvalgi taxminan 60 foizlik körsatkiçdan deyarli farq qilmaydi.

Öz akkauntlarini saqlab qolgan bolalarning deyarli yarmi platformalar ularning yoşini tekşirmaganini ma’lum qilgan. Bu esa ularning xizmatlardan foydalanişda davom etişiga sabab bölgan.

Boşqalar esa akkauntlarida yoş 16 yoki undan katta deb körsatilganini yoki yoşni tekşiriş tizimlari ularni belgilangan yoş çegarasidan katta deb xato aniqlaganini ma’lum qilgan.

Mart oyidagi yangilanişdan söng eSafety beşta platforma (Facebook, Instagram, Snapçat, TikTok, YouTube) tomonidan qoidalarga rioya qilmaslik holatlarini tekşirayotganini bildirdi.

Iyun oyida hukumat taqiqqa amal qilmagan texnologik şirkatlarga nisbatan qöllaniladigan eng yuqori jarima miqdorini ikki baravarga oşirişini va eSafety’ning ma’lumot yiğiş vakolatlarini kuçaytirişini e’lon qildi.