Эрон Ёзувчилар уюшмаси мамлакатдаги қатлларни қоралади

Эрон Ёзувчилар уюшмаси янги баёнотида Эронда ўлим жазоси тайинланиши ва ижро этилишини кескин қоралади. Бу ҳақда DW нашри хабар берди.

3 сентябрь куни эълон қилинган ушбу баёнотда қатл “қатағоннинг яланғоч кўриниши” деб аталган, унинг жамоат олдида ижро этилиши эса “кучни кўз-кўз қилиш ва жамиятда қўрқув уйғотиш” сифатида тасвирланган.

Шунингдек, Эрон Ёзувчилар уюшмаси баёнотида “айбланувчининг адвокат билан эркин учраша олмаслиги, узоқ вақт ҳибсда сақланиши, оила аъзоларининг хабарсиз қолдирилиши, жисмоний ва руҳий тазйиқлар остида олинган иқрорлар ҳамда маҳбусларни чидаб бўлмас шароитлардан қутулиш учун сўралган ҳар қандай гапни айтишга мажбурловчи “номаълум муддатли қамоқ” каби ҳолатлар айбланувчилар ҳуқуқлари кенг кўламда поймол этилишининг бир қисми, холос” деб таърифланган.

Баёнотда жорий йил январдаги норозилик намойишлари, намойишчиларга қарши кенг кўламли босимлар ҳамда ҳибсга олишлар ва хавфсизликка оид ишларнинг кўпайгани тилга олиниб, уруш баҳонасида ўлим жазоларини чиқариш ва ижро этиш амалиёти кучайиб бораётгани таъкидланади.

“Ушбу механизм Ислом Республикаси ташкил топган илк йиллариданоқ мухолифлар ва танқидчиларга қарши юритиб келаётган сиёсатнинг давомидир. Норозиликни доимо жиноят, мухолифатни хавфсизликка таҳдид, ўзгача фикрловчиларни эса душман деб билган ҳукумат қатллардан нафақат “жазо” сифатида, балки жамиятда қўрқув ва ваҳима уйғотиш учун ҳам фойдаланади”.

Эрон Ёзувчилар уюшмаси “қатл жазоларига қарши туриш, уларга қатъий қаршилик кўрсатиш зарурлигини” таъкидлаб, баёнотини қуйидагича якунлади: “Яшаш ҳуқуқи ҳукуматларнинг имтиёзи эмас ва ҳеч бир инсон қонун номи билан бу ҳуқуқдан маҳрум қилиниши мумкин эмас”.

Норвегияда жойлашган “Эрон инсон ҳуқуқлари” ташкилоти ҳисоботига кўра, 2026 йил давомида Эронда шу кунга қадар 533 киши қатл этилган.