“Очофат йиртқичлар” – Трамп, Путин ва Нетаняҳу халқаро ҳуқуқни бузишда айбланди

Ташкилот Исроил, Россия ва АҚШни халқаро инсон ҳуқуқларини поймол этишда етакчи деб атаб, уч давлат раҳбарларини иқтисодий ва сиёсий ҳукмронликка интилаётган “очофат йиртқичлар” дея таърифлади.

“Ибтидоий ваҳшийлик авж олиши мумкин бўлган глобал муҳит анчадан бери шаклланмоқда”, — деб ёзди ташкилот раҳбари Агнес Калламард сешанба куни эълон қилинган йиллик ҳисоботда.

Матбуот анжуманида Калламард аксарият ҳукуматлар “йиртқичлар”га қарши курашиш ўрнига, уларни овутишга мойил эканини айтди.

“Бироқ, Исроилнинг Ғазо секторидаги геноцидини ҳамда АҚШ-Исроилнинг Эронга ҳужумларини танқид қилгани учун Европада ажралиб турган Испания халқаро тизимни барбод қилаётган иккиюзламачилик ёндашувларидан устун турибди”, – деди Калламард.

Авторитаризм кучаймоқда

“Бутун дунёда авторитар амалиётлар кучайди”, — дейилади 400 саҳифалик ҳисоботда ва унда Афғонистондан тортиб Зимбабвегача бўлган мамлакатлардаги қонунбузарликлар санаб ўтилади.

Репрессияларга бағишланган бўлимида Буюк Британия“Фаластин ҳаракати” гуруҳига қарши кескин чоралар кўрганликда айбланади.

Ҳисоботга кўра, Афғонистонда Толибон аёлларни таълим ва ишдан четлатиш каби чоралар орқали 2025 йилда ҳам гендер асосидаги камситишларни давом эттирган.

Шунингдек, Непал ҳукумати далит аёлларга нисбатан гендер зўравонлиги ҳолатларини тергов қилмаганлиги айтилади.

“Amnesty international”нинг ҳисоботи дунё бўйлаб кўплаб можаролар авж олаётган бир пайтда эълон қилинди.

АҚШ ва Исроилнинг Эронга ҳужуми оқибатида 3000 дан ортиқ, Исроилнинг Ливанга ҳужумлари натижасида эса 2400 га яқин одам ҳалок бўлди.

Ғазода 2023 йил октябридан буён Исроил ҳужумларида қурбон бўлганларнинг сони 72,5 мингдан ошди.

Украинада эса тўрт йил олдин Россиянинг кенг миқёсли босқини бошланганидан бери 15 мингдан зиёд киши ҳалок бўлди.

“Инсонийлик меъёрларини қайта-қайта бузаётгани учун Исроилга нисбатан ҳеч қандай самарали чора кўрилмади”, – дейди Калламард.

Шундай бўлса-да, оптимизм учун ҳам бироз асос сифатида қуйидагиларни санаб ўтди:

-      Z авлоди бошчилигидаги норозилик намойишлари;

-      Халқаро Судда Жанубий Африканинг Исроилга қарши геноцид даъвосига қўшилаётганлар сони ортаётгани;

-      Европа Кенгашининг Украинага қарши тажовуз жинояти бўйича махсус трибунал тузгани;

-      Халқаро жиноят судининг “гендер таъқиби” учун Толибоннинг икки етакчисига ҳибсга олиш ордери бергани.