Ғазодаги урушда 500 дан ортиқ Марказий Осиё фуқаролари иштирок этган

Бу ҳақда «Ал-Жазира» хабар берди.

Қайд этилишича, жанг ҳаракатлари иштирокчиларининг аксарияти АҚШ ёки Европа давлатлари паспортларига эга. Манба маълумотларига кўра, 2023 йил 7 октябрдан бери Ғазода камида 72 061 киши ҳалок бўлган.

Дунё бўйлаб ҳуқуқни ҳимоя қилиш ташкилотлари Ғазодаги эҳтимолий ҳарбий жиноятларга алоқадор бўлиши мумкин бўлган хорижликларни аниқлаш ва жавобгарликка тортиш масаласини кўтармоқда. Айрим ҳарбийлар ижтимоий тармоқларда ўз ҳаракатларини намойиш этувчи видеоларни эълон қилган.

Маълумотларга кўра, Исроил армиясида камида 12 135 нафар АҚШ фуқароси хизмат қилади — бу энг юқори кўрсаткич. Шунингдек, 1 207 нафар ҳарбий хизматчи АҚШ, Исроил ва яна бир давлат фуқаролигига эга.

Кейинги ўринларда Франция — 6 127 нафар, Россия — 5 067 нафар, Германия — 3 901 нафар, Украина — 3 210 нафар, Буюк Британия — 1 686 нафар ва Руминия — 1 675 нафар фуқаро қайд этилган.

Исроил армиясида хизмат қилаётган фуқаролар сони бўйича Ўзбекистон 126 давлат орасида 27-ўринни эгаллайди. 264 киши қўшалоқ фуқароликка (Ўзбекистон ва Исроил), яна 5 киши бир нечта фуқароликка эга.

Марказий Осиё давлатлари кесимида кўрсаткичлар қуйидагича:
— Қозоғистон — 189 нафар (қўшалоқ фуқаролик), 3 нафар (кўп фуқаролик);
— Қирғизистон — 52 нафар (қўшалоқ фуқаролик), 3 нафар (кўп фуқаролик);
— Туркманистон — 31 нафар (қўшалоқ фуқаролик), 2 нафар (кўп фуқаролик);
— Тожикистон — 8 нафар (қўшалоқ фуқаролик).

Таъкидлаш жоизки, Марказий Осиё давлатларининг барчаси қонунчилигида хорижий қуролли кучларда хизмат қилиш ва ёлланма аскарлик учун жиноий жавобгарлик белгиланган.