updated: 19.03.2026, 23:45

Ғазони тиклаш учун ўнлаб миллиард доллар талаб этилади

Буюк Британия, Миср ва Фаластин ҳамкорлигида Уилтон Паркда ўтказилган конференцияда Ғазо секторидаги қайта тиклаш ишлари ўнлаб миллиард доллар маблағни талаб этиши таъкидланди.

Жаҳон

18.10.2025, 10:01

Lotinchada

Улашиш:

«Ғазони тиклашни молиялаштириш» мавзусидаги анжуманда халқаро инвесторлар, араб давлатлари ва фаластинлик хусусий сектор вакиллари иштирок этди. Улар иқтисодий тикланиш жараёнида хусусий сектор иштирокини кенгайтириш ва халқаро молиявий ёрдамни жалб қилиш зарурлигини қайд этдилар.

Анжуман якунидаги баёнотда Ғазодаги оташкесимнинг бошланиши, исроиллик асирларни озод этиш ва фаластинликларни оилалари билан бирлаштириш юзасидан қўлга киритилган натижалар олқишланди. Шунингдек, АҚШ раҳбарлиги ва воситачилик фаолияти учун миннатдорлик билдирилди.

Ҳужжатда таъкидланишича, барқарор тинчликка эришиш учун фақат сиёсий саъй-ҳаракатлар эмас, балки иқтисодий тикланиш ва Ғазони қайта қуриш ишлари ҳам муҳим аҳамиятга эга.

Конференцияда араб давлатлари томонидан илгари таклиф этилган Ғазони барвақт тиклаш ва ривожлантириш бўйича араб-ислом режаси асосидаги дастурлар ҳам муҳокама қилинди.

Таъкидланишича, бу жараён молиявий ресурслар билан бирга хусусий секторнинг фаол иштирокини ва мутахассислик салоҳиятини талаб этади. Анжуман якунида, хусусий сармоялар ҳисобига барқарор тикланиш йўлларини белгилаш бўйича муайян илгарилашга эришилгани қайд этилди.

Эслатиб ўтамиз, 9 октябрь куни АҚШ президенти Дональд Трампнинг баёнотига кўра, Исроил ва ҲАМАС ўртасидаги оташкесим режаси илк босқичда мақулланган, ҳамда 10 октябрдан кучга кирган. Шарм аш-Шайх шаҳрида бўлиб ўтган тинчлик саммитида Миср, Туркия, АҚШ ва бошқа давлатлар раҳбарлари иштирок этган.

Жаҳон

18.10.2025, 10:01

Улашиш:

#Ғазо

мавзуга оид янгиликлар