ҲАМАС яқин кунларда Трамп режасига жавоб беради

Ҳаракат сиёсий бюроси аъзоси Муҳаммад Наззалнинг айтишича, 30 сентябрда эълон қилинган режа бўйича фаластинлик гуруҳлар, мустақил фаоллар ва воситачилар билан маслаҳатлашувлар олиб борилмоқда.

«Бизнинг танқидларимиз кўп, аммо масалага жиддий ёндашяпмиз. Якуний қарорда фаластинлик халқнинг олий манфаатлари ва миллий ишнинг стратегик тамойиллари ҳисобга олинади», — деди у.

Наззал ҳаракатнинг мақсади вақт босими эмас, балки икки йилдан бери Ғазода давом этаётган оммавий қотилликларни тўхтатиш эканини таъкидлади: «Биз қон тўкилиши учинчи йилга ўтмаслигини истаймиз».

Эслатиб ўтамиз, 29 сентябрда Трамп «Ғазодаги можарони тўхтатиш бўйича комплекс режа»ни тақдим этган эди. Ҳужжат 20 банддан иборат бўлиб, унда оташкесим, Исроил қўшинларини босқичма-босқич чиқариш ва асирларни озод этиш назарда тутилган.

Исроил Бош вазири Биньямин Нетаньяҳу режани қўллаб-қувватлаган, Қатар ва Миср эса уни ҲАМАСга етказган.