Ғазо: Исроилнинг сўнгги зарбалари бир оиланинг тўрт аъзосини ҳаётдан олиб кетди

Исроил ҳарбийлари сўнгги икки кун ичида уйларни бомбардимон қилишни кучайтирди. 

10 сентябрь куни Ғазо секторининг шимолидаги бир уйга берилган ҳаво зарбаси оқибатида бир эркак, унинг рафиқаcи ҳамда 8 ва 12 ёшли икки қизи ҳалок бўлди. Бу ҳақда Reuters нашри ёзди.

Исроил ҳарбийлари Байт Лаҳия шаҳридаги ушбу ҳужум юзасидан ҳозирча изоҳ бермаган.

Исроил ва ҲАМАС бир-бирини айбламоқда

2025 йил октябрь ойида АҚШ воситачилигида эришилган сулҳ кенг кўламли жанговор ҳаракатларни тўхтатган бўлса-да, Исроил зарбаларига батамом чек қўймади.

ҲАМАС ва Исроил бир-бирини сулҳ битимини бузишда айбламоқда.

Ўт очишни тўхтатиш келишуви кучга кирганидан бери Ғазода 1300 дан ортиқ фаластинлик – асосан тинч аҳоли вакиллари ҳалок бўлган. Шунингдек, Исроил расмийларининг айтишича, 4 нафар исроиллик аскар ҳам ўлдирилган.

Маҳаллий аҳоли ва шифокорларнинг сўзларига кўра, Исроил ҳарбийлари сўнгги икки кун ичида анклав бўйлаб камида олтита уйга зарба берган. Бу зарбалар оқибатида яқин атрофдаги уйлар ва чодирлардан иборат бошпаналарга зиён етган, кўплаб оилалар эса уйларини ташлаб қочишга мажбур бўлган.

Исроил ҳарбийлари 9 сентябрь куни Ғазо секторидаги учта ҳудудга зарба бериб, ҲАМАСнинг учта қурол-яроғ омборини йўқ қилганини маълум қилди.

Ҳарбийларнинг хабар беришича, 8-сентябрь куни ҳам ҲАМАС ва “Исломий жиҳод”га тегишли учта қурол-яроғ омбори йўқ қилинган. Уларда ракеталар ва милтиқлар сақланиб, ракета учириш майдончаси ҳам бўлган, дейилади хабарда.

ҲАМАС бошқарувидаги Ғазо ҳукумати матбуот хизмати раҳбари Исмоил Ас-Савобта Исроилнинг даъволарини рад этиб, унинг нишонлари “тинч аҳоли ва уларнинг уйлари” бўлганини айтди.