Ҳиндистон бош вазири масофавий ишлашга қайтишни таклиф қилди

Ҳиндистон Бош вазири валютани тежаш ва импорт қилинадиган энергия ресурсларига қарамликни камайтириш муҳимлигини таъкидлади. 

“Коронавирус даврида уйдан ишладик, виртуал учрашувлар ва видеоконференсиялар ўтказдик. Биз бунга кўникиб қолгандик. Шу усулларга қайтиш – ҳозирги замон талаби”, - деди Нарендра Моди.

Унинг айтишича, мамлакат фуқаролари истеъмол одатларини қайта кўриб чиқиши лозим.

"Ўрта қатлам орасида чет элда тўй ўтказиш, хорижга саёҳат қилиш ва дам олишни ташкил этиш кенг тарқалмоқда. Ушбу инқироз даврида хориж сафарларини камида бир йилга кечиктириш тўғрисида қарор қабул қилишимиз керак", – деди у. 

Нарендра Моди шунингдек, фуқароларни бир йил давомида байрамлар пайтида олтин сотиб олишдан тийилишга чақирди.

Ҳукумат раҳбари ёқилғидан тежамкорлик билан фойдаланиш ҳам муҳимлигини таъкидлади.

"Энди бензин, дизель ёқилғиси ва газдан иложи борича тежамкорона фойдаланиш керак. Биз бу энергия ресурсларини чет элдан импорт қиламиз, шунинг учун фақат керакли миқдорда истеъмол қилишга ҳаракат қилишимиз  зарур", – деди Нарендра Моди.

Шу муносабат билан Бош вазир аҳолини жамоат транспорти ва темир йўллардан кўпроқ фойдаланишга чақирди.

Хусусан, метро бор жойда метрода юришни, бир йўналишда қатнайдиганлар эса битта транспортдан умумий фойдаланишни, юкларни эса темир йўллар орқали ташишни маслаҳат берди. 

Модининг фикрича, буларнинг барчаси бензин ва дизелга боғлиқликни камайтиради, натижада, хорижий валютага қарамлик ҳам пасаяди.