Hindiston bosh vaziri masofaviy ishlashga qaytishni taklif qildi

Hindiston Bosh vaziri valyutani tejash va import qilinadigan energiya resurslariga qaramlikni kamaytirish muhimligini ta'kidladi. 

“Koronavirus davrida uydan ishladik, virtual uchrashuvlar va videokonferensiyalar oʻtkazdik. Biz bunga koʻnikib qolgandik. Shu usullarga qaytish – hozirgi zamon talabi”, - dedi Narendra Modi.

Uning aytishicha, mamlakat fuqarolari iste’mol odatlarini qayta ko‘rib chiqishi lozim.

"O‘rta qatlam orasida chet elda to‘y o‘tkazish, xorijga sayohat qilish va dam olishni tashkil etish keng tarqalmoqda. Ushbu inqiroz davrida xorij safarlarini kamida bir yilga kechiktirish to‘g‘risida qaror qabul qilishimiz kerak", – dedi u. 

Narendra Modi shuningdek, fuqarolarni bir yil davomida bayramlar paytida oltin sotib olishdan tiyilishga chaqirdi.

Hukumat rahbari yoqilg'idan tejamkorlik bilan foydalanish ham muhimligini ta'kidladi.

"Endi benzin, dizel yoqilg'isi va gazdan iloji boricha tejamkorona foydalanish kerak. Biz bu energiya resurslarini chet eldan import qilamiz, shuning uchun faqat kerakli miqdorda iste'mol qilishga harakat qilishimiz  zarur", – dedi Narendra Modi.

Shu munosabat bilan Bosh vazir aholini jamoat transporti va temir yo'llardan ko'proq foydalanishga chaqirdi.

Xususan, metro bor joyda metroda yurishni, bir yo‘nalishda qatnaydiganlar esa bitta transportdan umumiy foydalanishni, yuklarni esa temir yo‘llar orqali tashishni maslahat berdi. 

Modining fikricha, bularning barchasi benzin va dizelga bog‘liqlikni kamaytiradi, natijada, xorijiy valyutaga qaramlik ham pasayadi.