Исроил: Эрдўған бошчилигидаги Туркия Исроилга нисбатан дипломатик ва иқтисодий санкциялар жорий этди

Саар Будапештда Венгрия ташқи ишлар ва ташқи савдо вазири Петер Сийярто билан қўшма матбуот анжумани ўтказди. У Можаристон пойтахтига расмий ташриф билан келган эди.

Исроил ташқи ишлар вазири халқаро судда Исроилнинг Бирлашган Миллатлар Ташкилоти (БМТ) агентликларига нисбатан ҳаракатлари кўриб чиқилганини эслатди. Унга кўра, Тел-Авив ҳукумати Ғазодаги БМТ агентликларини қўллаб-қувватлаш ҳақида қарор қабул қилган бўлса-да, Исроил БМТнинг Фаластин қочқинларига ёрдам кўрсатиш агентлиги (БАПОР) билан ҳамкорлик қилмаслиги ва халқаро судлар қарорларини тан олмаслигини таъкидлади.

Саар Туркиянинг Ғазода жойлаштирилиши мумкин бўлган халқаро ҳарбий кучларда иштирок этиш эҳтимоли ҳақидаги саволга жавобан шундай деди:

«Эрдўған бошчилигидаги Туркия Исроилга нисбатан фақат салбий баёнотлар билан чекланиб қолмади, балки дипломатик ва иқтисодий санкциялар орқали ҳам ўз позициясини кўрсатди».

Вазирнинг сўзларига кўра, Фаластин маъмурияти озод этилган фаластинликларга тўловлар амалга оширмоқда, Европа Иттифоқ эса бу ҳаракатлар учун жавобгарлик талаб қилиш ўрнига, уларни «оқлайди» ва ёрдам кўрсатишда давом этмоқда.

Саар таъкидлашича, Исроил армиясининг Ғазо секторидаги оккупация қилинган ҳудудлардан чиқиши “ҲАМАСнинг қуролсизлантирилишига боғлиқ”. Шундан сўнггина улар келишув доирасида чиқишни амалга ошириши мумкин.

Шунингдек, у Исроил парламентида оккупация қилинган Ғарбий соҳилни аннексия қилиш тўғрисидаги қонун лойиҳасини мухолифат киритганини маълум қилди. Саарнинг таъкидлашича, мазкур лойиҳа АҚШ вице-президенти Жей Ди Вэнснинг Исроилга ташрифи чоғида муҳокамага киритилгани “на оқилона, на масъулиятли қадам”дир. Ҳукумат бу ташаббусни қўллаб-қувватламайди ва қонун парламент томонидан қабул қилинмайди.

Шу билан бирга, Исроил тадбиркорлари Венгрияга мамлакат тарихидаги энг йирик савдо делегацияси билан етиб боргани, уларнинг венгер ҳамкасблари билан 150 дан ортиқ ишбилармонлик учрашувлари ўтказиши режалаштирилгани маълум қилинди.

Халқаро суд 22 октябрдаги маслаҳат хулосасида Исроилнинг БМТ муассасаларига нисбатан чекловлари халқаро ҳуқуққа зид эканини билдирган. Суднинг баёнотига кўра, Исроил фуқароларга инсонпарварлик ёрдамини етказиш учун масъул бўлиб, БМТ агентликлари фаолиятини тўсиш ёки чеклаш ҳуқуқига эга эмас.

Эслатиб ўтамиз, 2024 йил 28 октябрда Исроил парламенти БАПОРни мамлакат ҳудудида таъқиқланган ташкилот деб эълон қилган ва шу орқали 1949 йилдан буён амал қилиб келаётган агентлик фаолияти чекланган эди.