Нидерландияга қарашли кемада хантавирус тарқалди

Ҳодиса кема Африканинг ғарбий қирғоқларида жойлашган Кабо-Верде орол-давлати яқинида сузиб кетаётган вақтда юз берган.

ОАВ хабарларига кўра, кема бундан уч ҳафта аввал Аргентинадан 150 нафар йўловчи билан йўлга чиққан. Кабо-Вердега етиб келгунга қадар Антарктида ва бошқа бир қатор ҳудудларда тўхтаб ўтган.

Нидерландия Ташқи ишлар вазирлиги вакили кемадаги икки нафар нидерландиялик йўловчи вафот этганини тасдиқлади, бироқ ўлим сабабларига оид бошқа тафсилотларни очиқламади.

Жаҳон соғлиқни сақлаш ташкилоти (ЖССТ) ўзининг Х саҳифасида маълум қилишича, касалланган йўловчилардан бири ҳозирда Жанубий Африкадаги шифохонанинг жонлантириш бўлимида.

Sky News нашри Жанубий Африка Соғлиқни сақлаш вазирлигига таяниб, оғир аҳволдаги ушбу бемор Британия фуқароси эканлигини хабар қилди.

Ҳозирда мутахассислар кемадаги кутилмаган вазиятнинг аниқ сабабларини суриштирмоқда.

ЖССТ касаллик авж олишини ўрганаётганини маълум қилди. Агентликнинг хабар беришича, лаборатория таҳлиллари олти кишидан бирида хантавирус борлигини тасдиқлаган.

Oceanwide Expeditions компаниясининг билдиришича, Кабо-Верде расмийлари тиббий ёрдамга муҳтож йўловчиларнинг қирғоққа тушишига рухсат бермаган.

Нидерландия ҳукумати эса касаллик аломатлари бўлган икки нафар йўловчини ҳамда вафот этган шахснинг жасадини ватанига қайтариш (репатриация) чораларини кўряпти.

Хантавирус кемирувчиларнинг ахлати ва пешоби ҳавога кўтарилиши орқали тарқалиши мумкин — масалан, одамлар сичқонлар яшаган бостирмаларни супурганида бу ҳолат кузатилади. ЖССТнинг қайд этишича, камдан-кам ҳолларда вирус одамдан-одамга ҳам юқиши мумкин.

Касаллик гриппга ўхшаш аломатлар билан бошланиб, кейинчалик юрак ва ўпка етишмовчилигига олиб келади. Касалланганларнинг тахминан 40 фоизи вафот этади.

Хантавирусни даволаш учун махсус дори воситалари мавжуд эмас, шу сабабли асосий эътибор қувватловчи терапияга қаратилади; оғир ҳолатларда беморлар ўпкаси сунъий шамоллатиш аппаратларига уланади.

Британия Ташқи ишлар вазирлиги ва Жанубий Африка Соғлиқни сақлаш вазирлиги ҳозирча ҳолат бўйича изоҳ бермади.