Куба маҳбусларни оммавий озод қилишни бошлади

Бу қарор Reuters маълумотига кўра, АҚШ томонидан сўнгги ўн йилликлардаги энг кучли босим кампанияси фонида эълон қилинган.

Давлат ОАВларига кўра, 2 000 дан ортиқ маҳбус озод этилиши режалаштирилган. 

АҚШ ҳукумати эса озод этилганлар орасида сиёсий маҳбуслар бор-йўқлигини диққат билан кузатаётганини билдирди. Вашингтон узоқ вақтдан бери Кубада юзлаб сиёсий маҳбуслар борлигини таъкидлаб келади, аммо Гавана бу даъволарни рад этиб, улар жиноят содир этган шахслар эканини айтмоқда.

Гавана яқинидаги Ла Лима қамоқхонасидан чиққан маҳбуслар билан суҳбатлашган журналистлар уларнинг асосан ўғрилик ва пора олиш каби жиноятлар учун жазо ўтаганини маълум қилди.

“Яшасин эркинлик!” — деди озод этилганлардан бири яқинларини қучоқлаб.

2024 йилда пора олиш учун судланган ва ҳозир озод этилган Абель Тамайо бу қарорни ижобий баҳолаб, уни ҳукуматнинг мулоқот ва миллий бирликка очиқлиги сифатида таърифлади.

Куба расмийлари бу қарор АҚШ босими остида қабул қилинганини инкор этмоқда. Шунингдек, расмий хабарларда Папа Франциск ёки Ватикан иштирок этгани ҳақида маълумот берилмаган.

Ҳуқуқ ҳимоячилари эса эҳтиёткорлик билан муносабат билдирмоқда. Уларнинг айтишича, ҳозирча “виждон маҳбуслари” — сиёсий сабабларга кўра қамалган шахслар озод этилгани ҳақида аниқ маълумот йўқ.

Маълумотларга кўра, Куба одатда амнистия доирасида озод этилганлар рўйхатини эълон қилмайди, бу эса мустақил текширувни қийинлаштиради.

Эслатиб ўтамиз, 2015 йилда Папа Франциск ташрифи арафасида Куба 3 500 дан ортиқ маҳбусни озод қилган эди. 2026 йил март ойида эса яна 51 маҳбус Ватикан билан келишув доирасида озод этилган.

Кузатувчилар фикрича, агар сиёсий маҳбуслар ҳам озод қилинса, бу Куба ва АҚШ ўртасидаги муносабатларда муҳим бурилиш нуқтасига айланиши мумкин.