Никол Пашинян сайловда ғалаба қозонганини эълон қилди

Душанба куни эрталаб Арманистон бош вазири Никол Пашинян мамлакатдаги умумхалқ сайловларида ғалаба қозонганини даъво қилди, чунки дастлабки натижалар унинг ҳукмрон “Фуқаролик шартномаси” партияси 49,81 фоиз овоз билан биринчи ўринни эгаллаганини кўрсатди.

Пашинян ва ҳукмрон “Фуқаролик шартномаси” партияси Арманистон учун янги геосиёсий йўналиш, жумладан, мамлакатни Москвадан узоқлаштириш ва Европа Иттифоқига қўшилиш бўйича кучли мандат олишга ҳаракат қилмоқда.

Унинг асосий рақиби, Россияда бойлик орттирган миллиардер Самвел Карапетян ҳукуматни ағдаришга даъват қилганликда айбланиб, уй қамоғида сақланмоқда. 23,29 фоиз овоз билан иккинчи ўринни эгаллаган “Кучли Арманистон” блоки номзоди Карапетян бу айбловни рад этди.

Карапетяннинг “Кучли Арманистон” партияси Россия билан алоқаларни ривожлантиришга интилади ва Пашинянни Кремль билан уруш бошлашга уринаётганликда айблаган.

Шунингдек, “Арманистон” ва “Гуллаётган Арманистон” партиялари ҳам мос равишда 9,94 фоиз ва 4 фоиз овоз тўплаб, парламентдан жой олди. Сайлов комиссияси хабарига кўра, сайловчиларнинг иштироки 59,97 фоизни ташкил этган.

Сайлов натижалари маълум бўлишидан аввал Пашинян штаб-квартирасида журналистлар билан суҳбатлашиб, партияси мисли кўрилмаган натижа билан ғалаба қозонганини ва ҳукуматни якка ўзи шакллантиришини даъво қилди.