Россия Европа билан музокараларга тайёр – Дмитрий Песков

Кремль матбуот котиби Дмитрий Песковнинг сўзларига кўра, кун тартибида бир талай мураккаб масалалар борлиги ҳисобга олинса, соғлом фикр музокараларни тақозо этади. Бироқ европаликлар Россияга нисбатан ўз ёндашувини ўзгартириши лозим.

“Европаликлар янглиш қарашга эга: улар Россия билан музокаралар кучли позициядан ва Россиянинг заифлигига таяниб олиб борилиши керак, деб ҳисоблайди. Бу – энг катта хато... Бундай гаплар билан бирон нарсага эришиш маҳол”, – деди у журналистларга.

Путин Европа ҳукуматлари билан музокараларга очиқлигини, бироқ биринчи қадамни улар қўйиши кераклигини, чунки алоқаларни айнан улар узганини таъкидлаган. Европа Иттифоқи Украинага бостириб киргани сабабли Россияга қарши 20 босқичли санкциялар жорий этган.

Европа позициясининг ўзгариши

Бир йилдан ошиқ вақт давомида четда туриб, зиддиятга барҳам бериш воситачилигини АҚШ президенти Доналд Трампга қўйиб берган Европа Иттифоқи Россия билан алоқа ўрнатишни эҳтиёткорона тарзда бошлади.

Европа Кенгаши раиси Антонио Коштанинг идораси сўнгги ҳафталарда алоқа каналларини очиш мақсадида Кремль билан дипломатик даражада қисқа мулоқотлар ўтказган.

Австрия канцлери Кристиан Штокер “Financial Times” нашрига берган интервьюсида Европа Иттифоқи Путин билан музокараларни қайта бошлаш учун Украинадаги тинчлик музокаралари атрофидаги “қулай вазият”дан фойдаланиши кераклигини айтди.

Песковнинг сўзларига кўра, агар қарши тараф ҳақиқий мулоқотга киришмоқчи бўлса, Россия музокара ўтказишга тайёр, бироқ бу панд-насиҳат қилиш ёки ультиматум қўйиш учун бўлмаслиги керак.

Москвага дрон зарбалари берилди

Украина Россия ичкарисидаги портлар, нефтни қайта ишлаш заводлари ва бошқа муҳим инфратузилмаларга берган дрон зарбалари туфайли урушдаги вазият ўзгартираётганини айтмоқда. Москва эса буни рад этиб, агар дипломатик келишувга эришилмаса, мақсадларига етиш учун курашни давом эттиришини таъкидламоқда.

Москва вилояти губернаторининг маълум қилишича, 18 июнь куни пойтахт ва унинг атрофидаги ҳудудларга қилинган кенг кўламли Украина ҳужумида саккиз ёшли қизалоқ ҳалок бўлган.

Нефтни қайта ишлаш заводининг ёнаётган тасвирлари Путинга кўрсатилган-кўрсатилмагани ҳақидаги саволга жавобан Россия кучлари зарба берган Украина шаҳарларини кўришни тавсия қилди Песков. “Бу зарбалар давом этади”, — деди у.