O‘tgan yili 124 nafardan ortiq ekologiya himoyachisi o‘ldirilgan

Global Witness tashkilotining yangi hisobotiga ko'ra, 2025-yilda o'rmonlar, yerlar va suv havzalarini himoya qilgan kamida 124 kishi hayotdan ko'z yumgan. Hisobot mualliflari boy davlatlarning tashqi yordamni keskin qisqartirishi inson huquqlari tashkilotlarini zaiflashtirganini, bu esa ekologiya himoyachilarini yanada himoyasiz qoldirganini ta'kidlashadi.

Global Witnessning katta kampaniya vakili Juliana Vélez Echeverri fikricha, AQShdan keladigan yordam keskin kamaygani sabab Kolumbiyada inson huquqlarini himoya qiluvchi loyihalar jiddiy zarar ko'rmoqda.

Qotilliklarning 85 foizi Lotin Amerikasida qayd etilgan. Eng ko'p holat Kolumbiyada — 39 ta, Braziliyada esa 26 ta. Halok bo'lganlarning qariyb uchdan biri tub mahalliy aholi vakillari bo'lgan. Yer bilan bog'liq nizolar esa o'limlarning yarmidan ko'prog'iga sabab bo'lgan.

Kolumbiyada kokain ishlab chiqarish uchun ishlatiladigan koka o'simligi yetishtirilishi keskin oshgan, bu esa yer ustidan nizolarni kuchaytirib, himoyachilarni giyohvand moddalar sotuvchilari nishoniga aylantirmoqda. Braziliyada esa o'limlar asosan Amazoniya chekkalarida qayd etilgan, bu o'rmonlarning kesilishi bilan bo'gliq.

Filippin Osiyodagi eng xavfli davlat bo'lib qolmoqda. O'tgan yilning o'zida 12 nafar eko himoyachi o'ldirilgan, mamlakatda eko faollarga bosim kundan-kunga  kuchayib bormoqda. Boshqa mintaqalarda o'ldirilish holatlari nisbatan kam bo'lsa-da, hisobotda Indoneziyaning faollik harakatlarini jinoiy javobgarlikka tortish yo'lidan borayotgani, shuningdek Rossiya va Markaziy Osiyo davlatlaridagi rejimlarning siyosiy raqiblarni internet orqali obro'sizlantirish kampaniyalari orqali sindirishga urinayotgani qayd etilgan.