Ўзбекистонлик аёл Эпштейн иши бўйича гувоҳлик берди

Роза исмли аёл АҚШ Вакиллар палатаси демократлари томонидан ташкил этилган норасмий тингловда илк бор омма олдида чиқиш қилди. У ўсмирлик чоғида Эпштейннинг яқин ҳамкори ва модель агенти Жан-Люк Брюнел орқали у билан таништирилганини айтди.

Розанинг сўзларига кўра, 2009 йил июль ойида Брюнел уни Эпштейн билан учраштирган. Эпштейн эса унга “иқтисодий муаммоларини ҳал қилишга ёрдам бериш”ни ваъда қилиб, иш таклиф қилган. Аёл кейинчалик уч йил давомида зўравонликка учраганини билдирган.

Тинглов Роберт Гарсия ташаббуси билан Вест-Палм-Бич шаҳрида ўтказилди. Гарсиянинг айтишича, айнан шу ҳудудда Эпштейннинг жиноятлари илк бор фош этилган.

Мазкур йиғилиш АҚШ президенти Дональд Трампнинг Мар-а-Лаго қароргоҳига яқин жойда ташкил этилди. Уни Вакиллар палатасининг Назорат қўмитасидаги демократлар ҳамда маҳаллий демократ сиёсатчилар уюштирган.

Республикачилар кўпчиликни ташкил қиладиган қўмита айни пайтда Эпштейн билан боғлиқ ишларни кўриб чиқмоқда. Демократлар эса Эпштейн ҳужжатлари билан Трамп маъмурияти қандай ишлаганини текширишга эътибор қаратмоқда.

Норасмий тинглов юридик кучга эга бўлмаса-да, ташкилотчилар унинг асосий мақсади Эпштейн иши атрофидаги жамоатчилик эътиборини сақлаб қолиш эканини таъкидлади.