550 нафар собиқ амалдор Трампни Нетаньяҳуга босим ўтказишга чақирди

Исроилнинг 550 нафардан ортиқ собиқ ҳарбий, дипломатик ва разведка амалдорлари АҚШ президенти Дональд Трампдан Бош вазир Биньямин Нетаньяҳуни босиб олинган Ғарбий соҳилдаги кўчманчилар зўравонлигини тўхтатишни сўради.

Al Jazeera маълум қилишича, "Israel’s Security Commanders" (CIS) ташкилоти томонидан эълон қилинган мактубда Ғарбий соҳилдаги зўравонлик тез орада тўхтатилмаса, бу нафақат Исроил, балки АҚШ ва бутун минтақа хавфсизлиги учун жиддий оқибатларга олиб келиши таъкидланган.

Мактуб муаллифлари ўзларининг профессионал баҳосига кўра, вазиятнинг янада ёмонлашувининг олдини олишга қодир ягона шахс Дональд Трамп эканини билдирган.

CIS таркибига Исроил армиясининг истеъфодаги генерал ва полковниклари, шунингдек, Моссад, полиция ва ташқи ишлар тизимининг собиқ юқори лавозимли ходимлари киради.

Ташкилот айрим ҳукумат аъзоларини кўчманчилар ҳаракатларини қўллаб-қувватлаш ва уларни ҳуқуқий жавобгарликдан ҳимоя қилишда айблади. Уларга кўра, яҳудий кўчманчилар зўравонлигининг кучайиши 2023 йил 7 октябрдаги ҲАМАС ҳужуми оқибатларидан ҳам оғирроқ инқирозга сабаб бўлиши мумкин.

Мактуб Трамп ва Нетаньяҳу Вашингтонда учрашиши арафасида эълон қилинди. Бу ҳафта охирида Ғарбий соҳилда икки исроиллик ва тўрт фаластинлик ҳалок бўлган қуролли тўқнашувдан кейин кўчманчилар томонидан бир қатор ҳужумлар содир этилган эди.