АҚШ Саудия Арабистони билан ядро энергетикаси бўйича тарихий келишувни маъқуллади

Келишувга кўра, Саудия Арабистонида ядро энергетикаси инфратузилмасини барпо этишда асосий рол АҚШ компанияларига берилади. Бу эса Россия, Хитой ва бошқа хорижий рақобатчиларни лойиҳадан амалда четлатади.

Битимнинг энг муҳим бандларидан бири - зарурат тасдиқланса, АҚШ компаниялари Саудия Арабистонида уранни бойитиш заводини қуриши мумкин. Оқ уй бу орқали Вашингтон қиролликнинг ядро дастури устидан назорат ва таъсирини сақлаб қолишини, дастурнинг ҳарбий мақсадларга йўналтирилишининг олди олиниши мумкинлигини таъкидламоқда.

Яқин кунларда келишув АҚШ Конгресси кўриб чиқишига юборилади. Айрим конгрессменлар Яқин Шарқда уранни бойитиш технологияларининг тарқалишига қарши чиқиши кутилмоқда. Бироқ АҚШ қонунчилигига кўра, бундай битимни тўхтатиш жуда мураккаб: бунинг учун Конгресснинг ҳар икки палатасида учдан икки қисм овоз билан президент ветосини бекор қилиш талаб этилади.

Халқаро нашрларнинг қайд этишича, ушбу келишув АҚШ ядро саноатини жонлантириши, Вашингтон ва Ар-Риёд ўртасидаги стратегик ҳамкорликни янада мустаҳкамлаши ҳамда Саудия Арабистонининг ядро энергетикаси бозорида Россия ва Хитойнинг таъсирини сезиларли даражада чеклаши мумкин.

Шу билан бирга, экспертлар уранни бойитиш имкониятининг пайдо бўлиши узоқ муддатда Яқин Шарқда ядро қуролининг тарқалиши хавфини ҳам ошириши мумкинлиги ҳақида огоҳлантирмоқда.