Қирғизистон собиқ президенти Атамбаевнинг ўғли қўлга олинди

Бу ҳақда маҳаллий 24.kg нашри хабар берди.

Қўлга олинганлар орасида:

– МХДҚ Давлат қўриқлаш хизмати собиқ раҳбари Дамир Мусакеев,
– Социал-демократлар партияси етакчиси Темирлан Султонбеков,
– парламентнинг собиқ депутатлари Шайлобек Атазов ва Кубаничбек Қодиров ҳам бор.

Тергов айбловлари

Ички ишлар вазирлиги маълумотига кўра, жами 10 нафар шахс «парламент сайловлари якунлари фондида оммавий норозилик кайфияти мавжуд» деган тасаввур яратиш мақсадида митинглар уюштиришни режалаштирган. Уларга қуйидаги айбловлар қўйилмоқда:

– конститутцияга зид талабларни илгари суриш;
– давлат бинолари, телеканаллар ва куч тузилмалари объектларини эгаллашга уриниш;
– қўлга қурол-яроғ олиш;
– тартибсизликларга жиноят олами вакилларини жалб қилиш.

ИИВ хабарига кўра, тинтувлар давомида қурол-яроғ, ўқ-дорилар, гранаталар, алоқа воситалари, режалар, молиявий ҳужжатлар, гиёҳванд моддалар ва 150 минг доллар мусодара қилинган.

Ушланганларга Қирғизистон Жиноят кодексининг қуйидаги моддалари бўйича айблов эълон қилинди:

– 278-модда — «Оммавий тартибсизликларни ташкил этиш» (7 шахс);
– 326-модда — «Ҳокимиятни зўрлик билан эгаллаш» (3 шахс);
– шунингдек, 36-модда — «Жиноятга тайёргарлик кўриш»;
– 41-модда — «Жиноят иштирокчиларининг турлари».

Суд қарорига кўра, барча гумонланувчилар 2026 йил 17 январгача тергов изоляторида қолади.

Қирғизистон парламентига муддатидан олдинги сайловлар 30 ноябр куни бўлиб ўтади. Илгариги режага кўра сайлов 2026 йил ноябрида ўтказилиши керак эди, бироқ 25 сентябрь куни депутатлар ўз ваколатларини муддатидан олдин топширган.