Қозоғистонда давлат байроғи туширилган буюмлар тақиқланди

Қозоғистонда 2026 йил 13 июлдан бошлаб давлат байроғидан фойдаланишга оид янги тартиблар кучга киради. Ҳукумат томонидан тасдиқланган ўзгартиришларга кўра, давлат байроғини кийим-кечак, реклама ёки маиший буюм сифатида ишлатиш тақиқланади.

Янги қоидаларга мувофиқ, Қозоғистон давлат байроғидан қуйидаги мақсадларда фойдаланиш тақиқланади:

- кийим-кечак элементи сифатида;

- реклама мақсадларида;

- чойшаб, парда, дастурхон, гилам ва бошқа қоплама буюмлари сифатида.

Шу билан бирга, ҳукумат айрим ҳолатларда миллий рамзлардан фойдаланишга рухсат берилганини ҳам аниқлаштирди.

Хусусан:

- кўк рангдаги, қозоқ миллий нақшлари туширилган кийимлар тақиқланмайди;

- давлат байроғининг айнан ўзи эмас, балки миллий рамзлар ёки безак элементлари акс этган кийимларни кийиш мумкин;

- спортчилар учун давлат байроғи тасвири спорт формаси ва спорт анжомларида расман қўлланишига рухсат берилган.

Мутахассисларнинг изоҳига кўра, аввал тўлиқ давлат байроғи тасвири туширилган футболка ёки худилар учраши мумкин эди. Эндиликда эса бундай фойдаланиш расмий равишда тақиқланади. Бироқ кийим дизайнида кўк ранг, қуёш, бургут ёки қозоқ миллий орнаментларидан фойдаланиш автоматик равишда қонунбузарлик ҳисобланмайди. Муҳими, маҳсулот давлат байроғининг айнан ўзи кўринишида бўлмаслиги керак.

Мазкур ўзгартиришлар Қозоғистон Ҳукуматининг 2026 йил 26 июндаги қарори билан тасдиқланган бўлиб, давлат рамзларидан фойдаланиш тартибини янада аниқ белгилаш ва уларга нисбатан ҳурматни таъминлашга қаратилган.