Qozog‘istonda davlat bayrog‘i tushirilgan buyumlar taqiqlandi

Qozog‘istonda 2026-yil 13-iyuldan boshlab davlat bayrog‘idan foydalanishga oid yangi tartiblar kuchga kiradi. Hukumat tomonidan tasdiqlangan o‘zgartirishlarga ko‘ra, davlat bayrog‘ini kiyim-kechak, reklama yoki maishiy buyum sifatida ishlatishga ruxsat berilmaydi.

Yangi qoidalarga muvofiq, Qozog‘iston davlat bayrog‘idan quyidagi maqsadlarda foydalanish taqiqlanadi:

kiyim-kechak elementi sifatida;

reklama maqsadlarida;

choyshab, parda, dasturxon, gilam va boshqa qoplama buyumlari sifatida.

Shu bilan birga, hukumat ayrim holatlarda milliy ramzlardan foydalanishga ruxsat berilganini ham aniqlashtirdi.

Xususan:

ko‘k rangdagi, qozoq milliy naqshlari tushirilgan kiyimlar taqiqlanmaydi;

davlat bayrog‘ining aynan o‘zi emas, balki milliy ramzlar yoki bezak elementlari aks etgan kiyimlarni kiyish mumkin;

sportchilar uchun davlat bayrog‘i tasviri sport formasi va sport anjomlarida rasman qo‘llanishiga ruxsat berilgan.

Mutaxassislarning izohiga ko‘ra, avval to‘liq davlat bayrog‘i tasviri tushirilgan futbolka yoki xudilar uchrashi mumkin edi. Endilikda esa bunday foydalanish rasmiy ravishda taqiqlanadi. Biroq kiyim dizaynida ko‘k rang, quyosh, burgut yoki qozoq milliy ornamentlaridan foydalanish avtomatik ravishda qonunbuzarlik hisoblanmaydi. Muhimi, mahsulot davlat bayrog‘ining aynan o‘zi ko‘rinishida bo‘lmasligi kerak.

Mazkur o‘zgartirishlar Qozog‘iston Hukumatining 2026-yil 26-iyundagi qarori bilan tasdiqlangan bo‘lib, davlat ramzlaridan foydalanish tartibini yanada aniq belgilash va ularga nisbatan hurmatni ta'minlashga qaratilgan.