Афғонистонда тўй ва байрамларда мушакбозлик тақиқланди

Тегишли ҳужжат «Толибон» ҳукумати таркибидаги Амр маъруф ва наҳйи мункар вазирлиги томонидан тасдиқланган.

Маълумотларга кўра, вазирлик пиротехника воситалари одамларда қўрқув, хавотир ва руҳий зўриқишни келтириб чиқаришини билдирган. Идора ушбу тақиқни фуқаролар хавфсизлиги ва жамоат тартибини таъминлаш зарурати билан изоҳлаган.

Ҳужжатда Афғонистондаги байрам тадбирлари ислом меъёрлари ва шариат тамойилларига мувофиқ ўтказилиши кераклиги таъкидланган. Шунингдек, болалар, аёллар ва кексалар орасида ваҳима уйғотиши мумкин бўлган ҳаракатларга йўл қўйилмаслиги белгиланган.

Тақиқ пиротехника воситаларини сотувчи дўконлар, импорт қилувчилар, ишлаб чиқарувчилар ва савдогарларга, шунингдек, ушбу маҳсулотларни ишлаб чиқариш ёки мамлакатга етказиб бериш билан бевосита ёки билвосита боғлиқ шахсларга ҳам тааллуқли.

Вазирлик фуқаролар ва тадбиркорларни тақиқланган маҳсулотлардан фойдаланмасликка ҳамда уларнинг тарқатилишидан тийилишга чақирган. Қоидабузарларга Афғонистон қонунчилиги ва шариат қоидаларига мувофиқ чоралар кўрилиши айтилган, бироқ жазо турлари аниқ кўрсатилмаган.

Маҳаллий оммавий ахборот воситалари маълумотларига кўра, аввал ҳам айрим шаҳарларда фейерверклардан фойдаланиш чекланган эди. Бироқ ўша тақиқ бутун мамлакатни қамраб олмаган ва пиротехникадан фақат тунги соатларда – 21:00 дан 07:00 гача фойдаланишга рухсат берилмаган.