Россия Эронга ҳарбий ва гуманитар ёрдам кўрсатмоқда

Financial Timesнинг Ғарб разведкасига таяниб берган маълумотларига кўра, бу ёрдам Эрон режимига ҳарбий салоҳият ва ички барқарорликни мустаҳкамлаш учун мўлжалланган.

Бу АҚШ ва Исроилнинг кенг кўламли ҳарбий ҳаракатлари бошланганидан бери Россиядан Эронга тўғридан‑тўғри қурол етказиб берилган биринчи ҳужжатли ҳолат сифатида қайд этилмоқда. Эрон ривожланган дрон саноатига эга бўлса‑да, ҳозирда сифатли технологик ўзгаришларга эҳтиёж сезмоқда ва Россиянинг модернизация қилинган двигателлар, илғор навигация тизимлари ва радиоэлектрон тўсиқларга қарши ҳимоя усулларини кўчириб олишини кутмоқда.

Кремль Эронга спутник суратлари ва разведка маълумотларини ҳам тақдим қилмоқда, аммо С‑400 зенит‑ракеталарини бериш рад этилди, чунки бу АҚШ билан тўғридан‑тўғри тўқнашувга олиб келиши мумкин. Ёрдам март охиригача тўлиқ етказилиши кутилмоқда.

Россия Эроннинг қулаши Яқин Шарқдаги таъсирини йўқотишига олиб келиши мумкинлигини англаб, асимметрик йўлни танлади: С‑400 каби замонавий мудофаа ўрнига дронлар технологияларини тақдим этмоқда. Бу эса Исроил учун янги таҳдид яратади, чунки эронлик муҳандислар Россия алгоритмлари ва навигация тизимларини ўз дронларига интеграция қилса, ҳаво мудофаа тизимлари самарасиз бўлади.

Гуманитар юк аҳоли норозилигини пасайтириш ва режимнинг мамлакатдаги назоратини мустаҳкамлаш мақсадида ҳам қўлланилади.

Азиз СОЛИЕВ тайёрлади