Россия “Telegram”ни ҳам блоклаши мумкин

Россия ҳукумати “Telegram” мессенжерига нисбатан босимни янада кучайтирмоқда. Сўнгги маълумотларга кўра, платформа нафақат секинлаштирилиши, балки мамлакат ҳудудида тўлиқ тўхтатилиши ҳам мумкин.

9 февралдан бошлаб Россияда фойдаланувчилар “Telegram”даги техник узилишлардан шикоят қила бошлаган. “РБК” нашри манбаларига кўра, “Роскомнадзор” мессенжер фаолиятини чеклаш бўйича янги чоралар кўрилмоқда.

Секинлаштиришми ёки тўлиқ блокировка?

Мутахассислар фикрича, 10 февралдан бошлаб мессенжер ишини “қисман чеклаш”нинг техник босқичи бошланган. Айрим манбаларга кўра, секинлаштириш жараёни амалда аллақачон ишга тушган.

Ҳозирда фойдаланувчилар қуйидаги муаммоларга дуч келмоқда:

• фото ва видеолар юкланмаслиги;
• хабарларнинг кечикиб етиб бориши;
• матнли хабарларда ҳам узилишлар юзага келиши.

Журналист ва “Крипта” китоби муаллифи Андрей Захаровнинг таъкидлашича, яқин кунларда чекловлар янада кучайиши ва ҳатто оддий матнли хабар юбориш ҳам қийинлашиши мумкин.

Расмий муносабат

Ҳозирча расмий доиралар томонидан аниқ ва якдил баёнот берилгани йўқ. Давлат Думасининг ахборот сиёсати қўмитаси раиси ўринбосари Александр Юшченко қўмита даражасида мессенжерни секинлаштириш масаласи муҳокама қилинмаганини билдирди. Шу билан бирга, у “Роскомнадзор” қонун талаблари бузилган тақдирда мустақил равишда чеклов қўллаши мумкинлигини инкор этмади.

Эслатиб ўтамиз, 2025 йил август ойида “Telegram”нинг овозли қўнғироқлар хизмати “фирибгарлик ва терроризмга қарши кураш” баҳонаси билан чекланган эди.

“WhatsApp”дан кейинги навбат

Россияда ахборот платформаларини чеклаш тенденцияси 2025 йил охирида “WhatsApp”нинг деярли тўлиқ секинлаштирилиши билан бошланган эди. Энди эса навбат Россия аудиторияси учун муҳим ахборот каналларидан бири бўлган “Telegram”га келган кўринади.

“Downdetector” ва “Sboy.rf” платформалари 9 февралдан буён Россиянинг турли ҳудудларидан минглаб шикоятларни қайд этмоқда. Муаммолар Android, iOS ва desktop версияларида кузатилмоқда.

Агар “Telegram” тўлиқ блокланса, бу нафақат оддий фойдаланувчилар, балки бизнес алоқалари ва рақамли реклама бозори учун ҳам жиддий зарба бўлиши мумкин. Бу ҳолат Россия ҳукумати ахборот майдони устидан назоратни кучайтириш сиёсатини давом эттираётганини кўрсатади.