Россиянинг Киевга фалокатли ҳужуми: қурбонлар 13 тага етди

Россия 2 июль куни тонг саҳарда Украина пойтахти Киевга юзлаб дронлар ва ўнлаб ракеталар билан ҳужум қилди.

Ҳужум оқибатида турар жой бинолари вайрон бўлди, камида 13 киши ўлди. Кўплаб одамлар жароҳатланди.

Бу Россия томонидан жорий йилда Киевга қилган энг фалокатли иккинчи ҳужумдир.

"Россия Украинага яна бир бор кенг кўламли шафқатсиз ҳужум уюштирди. Душман ўнлаб баллистик ракеталар учирди. Энг кўп жабр кўрган Киев бўлди. Ҳозирга қадар 13 кишининг ҳалок бўлгани маълум".— деди Бош вазир Юлия Свириденко.

Президент Володимир Зеленский 1 июль куни Дублинга ташрифини қисқартириб, украиналикларни яқинлашаётган зарба ҳақида огоҳлантирган эди.

Украина Ҳарбий-ҳаво кучлари хабарига кўра, Россия 74 та ракета ва 496 та дрон учирган.

Ҳаво ҳужумидан мудофаа бўлинмалари уларнинг аксариятини уриб туширган, бироқ 25 та баллистик ракета ва 12 та дрон 33 та манзилга зарба берган.

Россия Мудофаа вазирлиги узоқ масофага учувчи юқори аниқликдаги қуроллар ҳамда дронлар ёрдамида кенг кўламли ҳужум амалга оширилганини, унда  Украинадаги ҳарбий ва энергетика объектлари, шунингдек, аэропортлар нишонга олинганини маълум қилди.

Киевда мотам

Украина Ташқи ишлар вазири Андрий Сибиҳанинг таъкидлашича, пойтахт даҳшатли тунни бошдан кечирган.

Киев мери Виталий Кличко жума кунини мотам куни деб эълон қилди. Унинг сўзларига кўра, қарийб 3 миллион аҳоли истиқомат қиладиган бутун шаҳар бўйлаб талафотлар қайд этилган.

Шаҳар расмийларига кўра, жароҳатланганлар сони 90 нафарга яқин. Улар орасида болалар, тез ёрдам фельдшерлари ва ҳайдовчилари ҳам бор. Шунингдек, айрим одамлар вайрон бўлган турар жой бинолари ичида қолиб кетган.

Россияга босимни ошириш керак

Украина бир неча йиллардан буён Россиянинг тўхтовсиз узоқ масофали ҳужумларини қабул қилиб келди. Бироқ сўнгги ойларда Киев ҳам Россия ҳудудининг ичкарисига, асосан, энергетика объектларига зарбаларни кучайтирди.

Оқибатда Россияда ёқилғи инқирози юз берди. Дунёнинг учинчи йирик нефть қазиб олувчи давлати Ҳиндистон каби узоқ ўлкалардан бензин импорт қилишга мажбур бўлди.

Бунга жавобан Россия Украина шаҳарларига ҳаво ҳужумларини янада кучайтириб, ўтган ойда ҳар икки мамлакат православ динининг пойдевори саналган Киевдаги минг йиллик соборга ҳам зарба берди.

Европа Иттифоқининг ташқи сиёсат бўйича раҳбари Кая Калласнинг таъкидлашича, Украинага ҳарбий ёрдамни узлуксиз давом эттириш ва Москвага босимни кучайтиришгина Россия ҳужумларини тўхтата олади.

"Зарбаларга жавобан Россиянинг ҳарбий-саноат мажмуасини дастаклаётган яна кўплаб ташкилотларга қарши санкциялар жорий этишни таклиф қиламан. Москва тинч аҳолига қанчалик кўп ҳужум қилса, санкциялар ҳам шунчалик кўпайтирилиши керак”, — дея ёзди у Х платформасидаги постида.

Тинч аҳоли ҳужумлар марказида

Зеленский тўрт йилдан ортиқ давом этаётган урушни тугатиш мақсадида Владимир Путинга юзма-юз музокаралар ўтказишни таклиф қилган, аммо Кремль раҳбари бундан бош тортмоқда.

Россия 2022 йил февралида Украинага босқинни бошлаганидан буён Киев ва бошқа шаҳарларга берилган зарбалар оқибатида минглаб украиналик тинч аҳоли вакиллари ҳалок бўлди.

Москва тинч аҳолига атайлаб ҳужум қилаётганини инкор этади. Бироқ ўзи фуқаролик инфратузилмаси деб атайдиган объектларга қилинган ҳужумларни қонуний деб ҳисоблайди. Чунки бу ҳаракат Украинанинг ҳарбий салоҳиятига путур етказади.

Киев ҳам ўз навбатида Россия ва Россия босиб олган Украина ҳудудларига кичикроқ миқёсда зарбалар берган.