Россия ва Украина ўт очишни вақтинча тўхтатди

Бу ҳақда Кремль матбуот хизмати хабар берди.

«Россия Қуролли кучлари олий бош қўмондони В.В. Путиннинг қарори билан яқинлашиб келаётган православ Пасхаси муносабати билан сулҳ эълон қилинди», дейилади хабарда.

Маълум қилинишича, ўт очишни тўхтатиш 11 апрель соат 16:00 дан 12 апрель куни кечгача давом этади. Мудофаа вазири Андрей Белоусов ва Бош штаб бошлиғи Валерий Герасимовга ушбу даврда барча йўналишларда жанг ҳаракатларини тўхтатиш бўйича кўрсатмалар берилган.

Кремль ўз баёнотида Украина ҳам бу келишувга амал қилишидан умид билдирган. Шу билан бирга, Россия қўшинларига «қарши томондан содир этилиши мумкин бўлган провокацияларга тайёр туриш» топширилган.

Украина ҳам сулҳга тайёрлигини билдирди

Украина президенти Владимир Зеленский ҳам Пасха байрами даврида сулҳ режимига амал қилишга тайёрлигини маълум қилди.

«Украина симметрик қадамларга тайёр эканини бир неча бор таъкидлаган. Биз бу йил Пасха байрамида ўт очишни тўхтатишни таклиф қилдик ва шунга мувофиқ ҳаракат қиламиз. Одамларга таҳдидлардан холи Пасха ва тинчлик сари ҳақиқий ҳаракат керак», — деб ёзди у X ижтимоий тармоғида.

Шунингдек, Украина раҳбари Россияда Пасхадан кейин ҳам зарбаларни қайта бошламаслик имконияти мавжудлигини таъкидлади.

Пасха муносабати билан эълон қилинган вақтинчалик сулҳ икки томон ўртасидаги кескинликни қисқа муддатга бўлса-да юмшатиши мумкин. Бироқ унинг қанчалик барқарор бўлиши ҳозирча ноаниқлигича қолмоқда.