Россияда ишлаб чиқарилган самолёт Ҳиндистонда фалокатга учради

Россияда ишлаб чиқарилган Antonov An-32 самолёти бугун Ассам штатидаги Жорҳат шаҳрига қўнаётганда аварияга учради, деб хабар берди ҳарбий-ҳаво кучлари.

Бортда қанча одам бўлгани ва қурбонлар ҳақида маълумот берилмаган баёнотда.

Шунингдек, ҳодиса сабабларини аниқлаш учун тергов комиссияси тузилаётгани айтиб ўтилган.

NDTV телеканали ҳалокат жойидан тасвирларни намойиш этди. Уларда қуюқ қора тутун ва парчаланиб кетган самолёт кўринган.

Икки двигателли турбовинтли Ан-32 самолёти юқори баландликларда ва экстремал иқлим шароитларида яхши парвоз қилиш учун махсус лойиҳалаштирилган.

Ҳиндистон ҳарбий-ҳаво кучлари мамлакатнинг энг чекка тоғли ҳудудларига ҳарбий юклар ва фуқаролик ёрдамини етказиш учун шундай самолётларнинг 100 га яқинига эга.

Ушбу турдаги самолёт иштирокидаги сўнгги йирик ҳалокат 2019 йилда Хитой билан чегара яқинидаги Аруначал-Прадеш штатида юз берган, ўшанда 13 киши ҳалок бўлганди.