Rossiyada ishlab chiqarilgan samolyot Hindistonda falokatga uchradi

Rossiyada ishlab chiqarilgan Antonov An-32 samolyoti bugun Assam shtatidagi Jorhat shahriga qo‘nayotganda avariyaga uchradi, deb xabar berdi harbiy-havo kuchlari.

Bortda qancha odam bo‘lgani va qurbonlar haqida ma’lumot berilmagan bayonotda.

Shuningdek, hodisa sabablarini aniqlash uchun tergov komissiyasi tuzilayotgani aytib o‘tilgan.

NDTV telekanali halokat joyidan tasvirlarni namoyish etdi. Ularda quyuq qora tutun va parchalanib ketgan samolyot ko‘ringan.

Ikki dvigatelli turbovintli An-32 samolyoti yuqori balandliklarda va ekstremal iqlim sharoitlarida yaxshi parvoz qilish uchun maxsus loyihalashtirilgan.

Hindiston harbiy-havo kuchlari mamlakatning eng chekka tog‘li hududlariga harbiy yuklar va fuqarolik yordamini yetkazish uchun shunday samolyotlarning 100 ga yaqiniga ega.

Ushbu turdagi samolyot ishtirokidagi so‘nggi yirik halokat 2019-yilda Xitoy bilan chegara yaqinidagi Arunachal-Pradesh shtatida yuz bergan, o‘shanda 13 kishi halok bo‘lgandi.