Шимолий Корея жавоб зарбаларига қодир янги эсминесни сувга туширди

Шимолий Корея етакчиси янги фойдаланишга топширилган эсминес қақшатқич жавоб зарбалари беришга қодир ядровий жавоб тизимининг бир қисми бўлишини айтди. Бу ҳақда Reuters хабар берди.

Бироқ кемада ядро қуроли бўлиш-бўлмаслигига аниқлик киритилмаган.

Ким Чен Ин мамлакатнинг ядровий салоҳиятини кенгайтиришга интилаётгани боис, Шимолий Корея ҳарбий-денгиз флотини модернизация қилиш саъй-ҳаракатларини кучайтирди.

6 сентябрь куни Вонсан порт шаҳрида кемани фойдаланишга топшириш маросимида сўзга чиққан Ким янги кеманинг Корея яриморолининг шарқий қисмидаги денгизга жойлаштирилиши Шимолий Корея душманларига аниқ ишора эканини таъкидлади.

“Денгизда ва сув остида суверенитетимизни намоён этиш вақти келди”, – дея Кимнинг сўзларидан иқтибос келтиради KCNA.

5000 тонналик “Канг Гон” эсминеси ўз тоифасидаги иккинчи жанговар кема бўлиб, у Шимолий Кореянинг ғарбий қирғоғида тахминан уч ой аввал “Чхве Хён” эсминеси сафга қўшилганидан сўнг фойдаланишга топширилди, деган Ким.

“Канг Гон” эсминесининг Корея яриморолидаги денгиз ҳудудига жойлаштирилиши АҚШ, Жанубий Корея ва Япония ҳарбий-денгиз кучларининг яриморол яқинидаги операцияларини тийиб туришга қаратилган.

Жанубий Корея, АҚШ ва Япония 7 сентябрь куни Жанубий Кореянинг Чежу оролидан жануби-шарқ ва жанубда жойлашган халқаро сувларда ҳар йили ўтказиладиган “Freedom Edge” машғулотларини бошлаган.

11 сентябргача давом этадиган машғулотларда уч давлатнинг асосий ҳарбий-денгиз ва ҳаво кучлари иштирок этмоқда. Машғулотлар Шимолий Кореянинг ядровий ва ракета таҳдидларини тийиб туриш ҳамда жавоб қайтариш салоҳиятини мустаҳкамлашга қаратилган.

Бундан ташқари, Ким Шимолий Кореянинг шарқий соҳилида ҳарбий-денгиз базалари қурилиши давом этаётганини, мамлакат янги ҳарбий-денгиз бўлинмаларини ташкил этиши ва турли тоифадаги ҳарбий кемаларни қуришини айтган.