Shimoliy Koreya javob zarbalariga qodir harbiy esminesni suvga tushirdi

Shimoliy Koreya yetakchisi yangi foydalanishga topshirilgan esmines qaqshatqich javob zarbalari berishga qodir yadroviy javob tizimining bir qismi bo‘lishini aytdi. Bu haqda Reuters xabar berdi.

Biroq kemada yadro quroli bo‘lish-bo‘lmasligiga aniqlik kiritilmagan.

Kim Chen In mamlakatning yadroviy salohiyatini kengaytirishga intilayotgani bois, Shimoliy Koreya harbiy-dengiz flotini modernizatsiya qilish sa’y-harakatlarini kuchaytirdi.

6-sentyabr kuni Vonsan port shahrida kemani foydalanishga topshirish marosimida so‘zga chiqqan Kim yangi kemaning Koreya yarimorolining sharqiy qismidagi dengizga joylashtirilishi Shimoliy Koreya dushmanlariga aniq ishora ekanini ta’kidladi.

“Dengizda va suv ostida suverenitetimizni namoyon etish vaqti keldi”, – deya Kimning so‘zlaridan iqtibos keltiradi KCNA.

5000 tonnalik “Kang Kon” esminesi o‘z toifasidagi ikkinchi jangovar kema bo‘lib, u Shimoliy Koreyaning g‘arbiy qirg‘og‘ida taxminan uch oy avval “Choe Hyon” esminesi safga qo‘shilganidan so‘ng foydalanishga topshirildi, degan Kim.

“Kang Kon” esminesining Koreya yarimorolidagi dengiz hududiga joylashtirilishi AQSH, Janubiy Koreya va Yaponiya harbiy-dengiz kuchlarining yarimorol yaqinidagi operatsiyalarini tiyib turishga qaratilgan.

Janubiy Koreya, AQSh va Yaponiya 7-sentyabr kuni Janubiy Koreyaning Cheju orolidan janubi-sharq va janubda joylashgan xalqaro suvlarda har yili o‘tkaziladigan “Freedom Edge” mashg‘ulotlarini boshlagan.

11-sentyabrgacha davom etadigan mashg‘ulotlarda uch davlatning asosiy harbiy-dengiz va havo kuchlari ishtirok etmoqda. Mashg‘ulotlar Shimoliy Koreyaning yadroviy va raketa tahdidlarini tiyib turish hamda javob qaytarish salohiyatini mustahkamlashga qaratilgan.

Bundan tashqari, Kim Shimoliy Koreyaning sharqiy sohilida harbiy-dengiz bazalari qurilishi davom etayotganini, mamlakat yangi harbiy-dengiz bo‘linmalarini tashkil etishi va turli toifadagi harbiy kemalarni qurishini aytgan.