Ким Чен Ин Россия-Украина урушини «Муқаддас уруш» деб атади

Шимолий Корея етакчиси Ким Чен Ин Россия президенти Владимир Путинга йўллаган мактубида икки давлат ўртасидаги ҳамкорликни кенгайтириш ва чуқурлаштириш ниятини билдирди. Бу ҳақда Reuters нашри хабар берди.

Ким Чен Ин душанба куни Путиннинг Шимолий Корея ташкил топганининг 78 йиллиги муносабати билан йўллаган табригига жавоб қайтарган. Унда Пхеньян ҳукумати Россия билан дўстлик, ўзаро ёрдам ва иттифоқчилик муносабатларига асосланган ҳар томонлама ҳамкорликни ривожлантиришга қатъий ирода борлигини таъкидлаган.

Шимолий Корея раҳбари Россиянинг ҳозирги «мамлакат хавфсизлиги манфаатлари ва халқаро адолатни ҳимоя қилиш учун муқаддас уруши»да ғалаба қозонишига ишонч билдирган. Бу ибора Россиянинг Украинадаги урушига ишора сифатида талқин қилинмоқда.

Ким Чен Ин Путин ва Россия халқига ўзининг «ўзгармас қўллаб-қувватлови»ни ваъда қилган.

Мазкур баёнот Москва ва Пхеньян ўртасидаги муносабатлар сезиларли даражада яқинлашган бир пайтда янгради. Шимолий Корея 2024 йилда Украинада Россия кучлари билан бирга жанг қилиш учун ҳарбий хизматчиларини юборган. Икки давлат ўзаро мудофаа шартномаси доирасида ҳарбий ҳамкорликни ҳам чуқурлаштирмоқда.

Ким Чен Ин якшанба куни Хитой раҳбари Си Цзиньпинга йўллаган жавоб мактубида ҳам Пекин билан анъанавий дўстликни янада ривожлантириш ва умумий социалистик мақсадларни илгари суриш учун ҳамкорлик қилишини билдирган.

Муаллиф: Ҳасанбой ОЧУН