Si Szinpin Pekinda Aleksandr Lukashenko bilan uchrashdi

Xitoy raisi Si Szinpin 27-iyun kuni Pekinda Rossiyaning asosiy ittifoqchisi bo‘lgan Belarus yetakchisi Aleksandr Lukashenko bilan uchrashdi.

Xitoyning CCTV davlat telekanali xabariga ko‘ra, Si Lukashenkoni “Diaoyutay” davlat mehmonxonasining hashamatli binosida qabul qilgan, biroq hozircha qo‘shimcha tafsilotlar keltirilmagan.

1994-yildan beri hokimiyat tepasidan tushmay kelayotgan Lukashenko 2022-yilda Moskvaga Belarus hududi orqali Ukrainaga bostirib kirishga ruxsat bergan, ammo urushga bevosita aralashishmasligini ta’kidlagan.

NATOning sharqiy ufqi bilan chegaradosh bo‘lgan Belarusda Rossiyaning yadroviy kallakka ega eng so‘nggi “Oreshnik” raketasi joylashtirilgan.

Ayni paytda Kiyev ittifoqchilari Pekinni uzoq vaqtdan beri Moskvaga yashirincha yordam berayotganlikda ayblab kelsa-da, Xitoy mojaro davomida o‘zini betaraf tomon sifatida ko‘rsatmoqda.

Xitoy Belarus milliy suverenitetini qo‘llab-quvvatlaydi

Reuters nashrining yozishicha, Si Szinpin Lukashenkoga Xitoy Belarusning milliy suvereniteti, mustaqilligi va hududiy yaxlitligini himoya qilish borasida ko‘makka tayyorligini aytgan.

Uchrashuv Belarus va Ukraina o‘rtasida ziddiyat kuchayib borayotgan bir paytda yuz berdi.

Volodimir Zelenskiyning fikricha, Putin Lukashenkoni Ukrainadagi urushda Rossiyani qo‘llab-quvvatlashni kuchaytirishga undamoqda.

Si Szinpin esa Xitoy va Belarus strategik aloqani saqlab turishi hamda rivojlantirishi lozimligini ta’kidlagan.

Shuningdek, Si Xitoy Belarusning rivojlanishi va bunyodkorlik ishlari uchun imkoniyatlari doirasida yordam berishga tayyorligini bildirdi.

“Xitoy-Belarus munosabatlari o‘zining “tarixiy cho‘qqisi”ga chiqdi”, — deb xabar berdi Belarus prezidentining “Pul Pervogo” nomli Telegram kanali.