Украина ва Саудия: Киев ҳарбий тажрибасини Форс кўрфазига экспорт қилмоқда

26 март куни қиролликка етиб келган президент Володимир Зеленский Х ижтимоий тармоғида Саудия валиаҳд шаҳзодаси Муҳаммад бин Салмон билан учрашув олдидан “муҳим келишув”га эришилганини маълум қилди.

“Бу келажакдаги шартномалар, технологик ҳамкорлик ва сармоялар учун замин яратади… Қолаверса, Саудия Арабистонида Украина учун аҳамиятли бўлган имкониятлар мавжуд. Ушбу ҳамкорлик ўзаро манфаатли бўлади”, – деб ёзди Зеленский

Саудия Арабистони ҳам икки давлат мудофаа харидлари бўйича меморандум имзолаганини эълон қилди.

Ар-Риёд 28 февраль куни – АҚШ ва Исроил Теҳронга биринчи марта зарба берганидан бери Эрондан учирилган юзлаб дронлар ва ўнлаб ракеталарни тутиб олган.

Теҳрон минтақадаги АҚШ объектларини нишонга олаётганини таъкидласа-да, тинч аҳолининг хатар остида қолиши муносабатларни ёмонлаштирди. Ҳужумлар натижасида ҳозирга қадар Форс кўрфази мамлакатларида 25 киши ҳалок бўлган.
 

Украинларнинг салоҳияти

Украина 2024 йилнинг охиридан бери кучайган Москванинг дрон ҳужумларига қарши арзон, аммо самарали тутиб олувчи дронларнинг асосий ишлаб чиқарувчисига айланди.

Биргина шу қишнинг ўзида Россия Украинага 19 мингдан ортиқ дрон учирган. Сешанба куни Москва тўрт йиллик уруш давридаги энг йирик ҳаво ҳужумларидан бирини амалга оширди: 24 соат ичида 948 та дрон учирди, оқибатда икки киши ҳалок бўлган.

Киевдаги “Ал-Жазира” мухбири Одри Макалпиннинг фикрича, Украинанинг дрон ҳужумларига қарши туриш тажрибаси тобора ошиб бормоқда. Бу соҳада, эҳтимол, жаҳон етакчиларидан бирига айланиб улгурди.

18 март куни Зеленский Эрон ҳужумларидан ҳимояланишда ёрдам бериш учун Яқин Шарққа 201 нафар дронларга қарши курашиш бўйича мутахассис юборилганини айтганди.

Украина Ҳаво мудофааси қўшинлари қўмондони ўринбосари Юрий Черевашенконинг айтишича, дронлар Яқин Шарқдаги қум бўронларида ўзига хос қийинчиликларга дуч келади. Аммо муваффақиятли тутиб олиш учувчининг маҳоратига боғлиқ.

Украина бежиз ёрдамга ошиқмаяпти

Bloomberg нашрининг билдиришича, Украинанинг Россия агрессиясига қарши ҳимояланишга мўлжалланган маблағлари тахминан икки ойга етади. Москва эса АҚШ ва Исроилнинг Эронга қарши уруши туфайли катта фойда кўрмоқда.

Жорий йилда Украинага жами 52 миллиард доллар ташқи ёрдам зарур, хусусан, Қўшма Штатлардан қурол сотиб олишга 15 миллиард доллар керак.

Ҳукумат ушбу моддий ва технологик эҳтиёжни бартараф этиш учун стратегик чора қидирмоқда.