Ультраўнгчи вазир Бен-Гвир Нетаньяҳуга ҳукуматни ағдариш билан таҳдид қилди

Бен-Гвир америкалик “X” ижтимоий тармоғидаги баёнотида ҳукумат қуролли ҳаракатлар орқали Ғазода ўз мақсадларига ета олмаганини таъкидлаб, “гаровдаги фуқароларнинг қайтиши қувонарли, аммо ҳужумлар кутилган натижа бермади”, деди.

Вазирнинг таъкидлашича, Исроил қамоқхоналарида умрбод жазога ҳукм қилинган 250 нафар фаластинлик маҳкумни озод этиш “жуда катта нарх” ҳисобланади. Шу боис у ва унинг партияси “Яҳудий куч” (Otzma Yehudit) келишувни қўллаб-қувватламаслигини, ҳукумат йиғилишида унга қарши чиқишини маълум қилди.

“Бизни алдашларига йўл қўймаймиз. Агар ҲАМАС раҳбарияти ўз ҳокимиятини сақлаб қолса, ‘Яҳудий куч’ ҳукуматдан чиқади”, — деди Бен-Гвир.

Унинг сўзларига кўра, асосий мақсад — ҲАМАС раҳбариятини йўқ қилиш ва бу масалада Нетаньяҳу шахсан ваъда берган.

Исроилнинг Channel 14 телеканали хабарига кўра, Ғазода эришилган оташкесим келишуви муҳокама қилинган хавфсизлик кабинети йиғилишидан сўнг, ҳукуматнинг кенгайтирилган мажлиси кечикиш билан бошланган.

Бу кечикишнинг сабаби сифатида, бош вазир Биньямин Нетаньяҳунинг АҚШ президенти Доналд Трампнинг Яқин Шарқ бўйича махсус вакили Стив Виткофф ва унинг собиқ маслаҳатчиси, куёви Жаред Кушнер билан учрашуви кўрсатилган.