Хитой шимолида оқсил касаллиги авж олди: вакциналар самара бермаяпти

Reuters хабар беришича, Хитой Қишлоқ хўжалиги вазирлиги маълумотларига кўра, Шинжон-Уйғур автоном тумани ва Гансу провинциясида жойлашган иккита подада 6229 бош чорва орасида 219 та касаллик ҳолати аниқланган.

Мутахассислар маълум қилишича, инфекция юқтирган ҳайвонларда оқсил вирусининг SAT1 серотипи қайд этилган. Ушбу штаммга қарши Хитойда ишлаб чиқарилган мавжуд вакциналар самара бермаяпти.

Расмийлар касалланган чорва молларини сўйиш ва ҳудудларда дезинфекция ишларини амалга оширмоқда. Бу эса касаллик тарқалишини чеклашга қаратилган фавқулодда чоралардан бири ҳисобланади.

Шу билан бирга, март ойида Новосибирск вилояти ва Олтой Республикасида ҳам чорва молларини оммавий йўқ қилиш ҳолатлари кузатилди. Расмийлар буни инфекцияга қарши чора сифатида изоҳлаган бўлса-да, касаллик тури аниқ очиқланмаган.

Вазият минтақада ветеринария назоратини кучайтириш ва янги штаммларга қарши самарали вакциналар ишлаб чиқиш зарурлигини кўрсатмоқда.