Хусийлар Саудия Арабистонига қарши денгиз блокадаси эълон қилди

Ямандаги хусий исёнчилари 20 июль куни Саудия Арабистонига денгиз блокадаси жорий этганини эълон қилди. Бу глобал нефть таъминотига яна бир таҳдиддир.

Хусийлар матбуот котиби Яҳё Сарий ўз видеомурожаатида ўтган ҳафта Сана аэропортининг бомбардимон қилинишига жавобан денгиз эмбаргоси (блокадаси) қўлланилишини маълум қилди. Гуруҳ ушбу ҳужумда саудияликларни айблаган эди.

Жорий йил бошида Эрон Доналд Трампнинг асоссиз урушига жавобан Ҳормуз бўғозини ёпди. Натижада жаҳон нефть бозорлари Яман қирғоғи яқинидаги сув йўли бўлган Боб ал-Мандаб бўғозига янада қарам бўлиб қолди.

Bloomberg нашрининг энергетика ва хомашё бўйича шарҳловчиси Хавер Бласнинг сўзларига кўра, Саудия Арабистони Қизил денгиздаги юк ташиш йўллари орқали кунига тахминан 4,5 миллион баррель нефть жўнатмоқда ва унинг асосий қисми Боб ал-Мандаб бўғозидан ўтади.

Хусийларнинг саудияликларга денгиз блокадаси жорий этиши АҚШ ўз хомашё захираларини сарфлаётган пайтга тўғри келди.

АҚШ Энергетика ахборот бошқармаси маълумотларига кўра, 10 июлда якунланган ҳафта давомида мамлакатдаги нефть захиралари 1,7 миллион баррелга камайиб, 1983 йилдан буён энг паст даражага тушган.

Энергия бозорида хавф остида

Чикаго университети сиёсатшуноси Роберт Пейпнинг огоҳлантиришича, хусийларнинг яна бир муҳим глобал юк ташиш йўлагини ёпиши жаҳон иқтисодиёти учун эҳтимолий фалокатдир. Чунки бу “кунига қўшимча 4-5 миллион баррель [нефть] йўқотилишини” англатади.

Иллинойс университети халқаро муносабатлар профессори Николас Гроссман ҳозирда глобал энергия таъминотини бўғиб қўяётган омиллар кўплигини таъкидлади.

“Эрон Ҳормуз бўғозини тўсмоқда. АҚШ Эрон кемалари ҳаракатини чекламоқда. Эрон Форс кўрфазидаги араб давлатларининг энергетика объектларини, АҚШ эса Эроннинг энергетика объектларини бомбардимон қилмоқда. Украина Россиядаги энергетика объектларига зарба бермоқда. Мана энди хусийлар томонидан Қизил денгиздаги кема қатновига чек қўйилмоқда. Нефть ва газ захиралари тугаяпти. Муаммолар кўп ва улар бир-бирига уланиб, вазиятни оғирлаштирмоқда”. — деб ёзган Гроссман.