Саудия Арабистони Мадина устида ракетани тутиб қолди

Саудия Арабистони бошчилигидаги коалиция 15 октябрь куни мамлакатнинг Мадина вилояти устида қанотли ракетани тутиб қолганини маълум қилди. Бу ҳақда Associated Press (AP) агентлиги хабар берди.

Коалиция баёнотида ракета тутиб қолингани айтилган, аммо ҳужум учун масъул томон кўрсатилмаган. Ямандаги ҳусийлар ҳаракатининг ҳарбий вакили Яҳё Сариъ эса гуруҳ Саудия Арабистонига қарши ушбу ҳужумни амалга оширмаганини билдирди.

Ҳусийлар аввалроқ Макка ва Мадина каби муқаддас шаҳарлардаги аэропортларга ҳужум қилмасликка ваъда берган эди.

Адендаги ҳукумат қароргоҳи яқинида ҳужум содир бўлди

15 октябрь куни Яманнинг порт шаҳри Аденда халқаро ҳамжамият тан олган ҳукумат фойдаланадиган сарой яқинида бир нечта портлаш содир бўлди. Яман расмийларининг дастлабки маълумотига кўра, ҳодиса оқибатида камида икки киши ҳалок бўлган, яна олти киши жароҳатланган.

Ҳусийлар ҳаракати ҳужум учун жавобгарликни ўз зиммасига олди. Яман ҳукумати ҳужумда ракета ва дронлардан фойдаланилганини билдирди. Ҳукумат вакилларининг айтишича, Аденда бўлган бош вазир ва вазирлар жабр кўрмаган.

Ямандаги можаро сўнгги ҳафталарда янада кескинлашган. Саудия Арабистони ҳукуматни қўллаб-қувватламоқда, ҳусийлар эса мамлакатнинг шимолий ҳудудларида фаолият юритади.

БМТ Хавфсизлик Кенгаши ҳужумларни қоралади

БМТ Хавфсизлик Кенгаши Саудия Арабистонига қарши давом этаётган ҳусийлар ҳужумларини кескин қоралади. Кенгаш баёнотида фуқаролик аэропортлари ва бошқа объектларга зарбалар хавфли экани таъкидланиб, Саудия Арабистонининг халқаро ҳуқуқ доирасида ўзини ҳимоя қилиш ҳуқуқи эътироф этилди.

Исроил ва Сурияда ҳам муҳим воқеалар қайд этилди

AP агентлигининг шу кунги минтақавий дайжестида Исроил ички хавфсизлик хизмати собиқ раҳбари Ронен Барнинг бош вазир Биньямин Нетаньяхуга қарши туҳмат бўйича даъво киритгани ҳам хабар қилинди. Бар 2023 йил 7 октябрдаги ҲАМАС ҳужумидан олдин хавф ҳақида огоҳлантирмагани тўғрисидаги айбловларни рад этмоқда.

Шунингдек, Ғазо сектори шимолидаги Исроил зарбаси оқибатида бир киши ҳалок бўлгани хабар қилинди. Сурияда эса 2025 йилда мамлакатнинг соҳилбўйи ҳудудларида содир бўлган мазҳаблараро зўравонликларга алоқадор беш кишига нисбатан суд ҳукми чиқарилган: икки киши ўлим жазосига, уч киши эса қамоқ жазосига ҳукм қилинган.

Муаллиф: Ҳасанбой ОЧУН