ЕИ Қирғизистон авиакомпаниялари бўйича муҳим қарор қабул қилди - Paradigma

БРЮССЕЛЬ. Paradigma Media мухбири хабар беришича, Европа комиссиясида бўлиб ўтган матбуот брифингида авиация ва рақамли технологиялар соҳасига оид икки муҳим масала муҳокама қилинди.

ЕИнинг ташқи ишлар ва хавфсизлик сиёсати бўйича бош матбуот котиби Анита Ҳиппер маълум қилишича, ЕИ Қирғизистоннинг сертификатланган барча авиакомпанияларини Европа ҳаво хавфсизлиги бўйича «қора рўйхат»дан чиқаришга қарор қилди. Шу тариқа, 2006 йилдан буён амалда бўлган тақиқ бекор қилинди.

Европа комиссияси бу қарорни Қирғизистонда фуқаро авиацияси соҳасида амалга оширилган ислоҳотлар, парвозлар хавфсизлиги устидан давлат назорати кучайтирилгани ҳамда миллий авиация тизимининг ICAO халқаро стандартларига мувофиқлаштирилгани билан изоҳлади.

Шунингдек, брифинг давомида Apple компаниясининг Siri хизмати бўйича ҳам саволларга жавоб берилди. Қайд этилишича, Apple ҳозирча Siri'нинг айрим янги функцияларини Европа бозорида ишга туширмаган. Бунга ЕИнинг рақамли бозорлар тўғрисидаги қонунчилигида белгиланган талаблар, хусусан, фойдаланувчиларга рақобатчи хизматлар ўртасида эркин танлов имкониятини яратиш мажбурияти сабаб бўлган.

Paradigma Media ушбу мавзу юзасидан Европа комиссиясидаги расмий тадбирдан маълумотларни кузатишда давом этади.