Зеленский Европа давлатлари раҳбарларига миннатдорлик билдирди

Украина президенти Владимир Зеленский Европа давлатлари раҳбарларига мамлакатнинг мустақиллиги ва ҳудудий яхлитлигини қўллаб-қувватлагани, шунингдек, «урушни муносиб тинчлик билан тугатишга ёрдам бериши мумкин бўлган» фаол дипломатик позицияси учун миннатдорлик изҳор этди. Бу ҳақда у ўзининг расмий Телеграм каналида ёзди.

«Биз барчамиз президент Трампнинг қатъиятини қўллаб-қувватлаймиз ва Россия яна бир бор дунёни алдашига йўл қўймайдиган позицияларни биргаликда шакллантиришимиз керак», — деди Зеленский.

Унинг таъкидлашича, «Россия армияси урушни тўхтатишга тайёргарлик кўрмаяпти», аксинча «янги ҳужум операцияларига тайёргарлик кўраётганини кўрсатадиган ҳаракатлар билан шуғулланмоқда». Шу шароитда, у таъкидлаганидек, «дунё бирлигига ҳеч нарса таҳдид солмаслиги жуда муҳим».

Зеленский Украина ва Европанинг хавфсизлигига оид масалалар барча томонлар томонидан муҳокама қилинаётганини айтиб, ҳар қандай қарор умумий хавфсизлик салоҳиятини ошириши кераклигини билдирди. Шунингдек, «қотилликларни тўхтатишдан бош тортгани учун Россия жавобгар бўлиши керак» ва «уруш ва оккупация давом этаётган экан, босим  ҳарбий, санкциявий ва дипломатик кўринишда давом этиши лозим»лигини қўшимча қилди.