"Квадробер"ларнинг ота-оналари жаримага тортилади — ИИВ

Қайд этилишича, тармоқларда ёшлар ўртасида ўзини маълум бир ҳайвон қиёфасини акс эттирувчи аксессуарлардан фойдаланган ҳолда ўша жонзотнинг хатти-ҳаракатларига тақлид қилиш кўринишидаги "квадроберлик субмаданият" шаклланган. Аввалроқ бу ҳолат Қозоғистон, Россия ва Украина ёшлари орасида кузатилган. Энди эса Тошкент шаҳрида ҳам учрамоқда. 

Жорий йилнинг 10 октябрь куни пойтахт кўчаларининг бирида ҳайвон қиёфасидаги ниқобни тақиб олган “квадробер” бола кузатилган. 11 октябрда эса яна бир “квадробер” итга тақлид қилиб ёш болага ҳужум қилган, воқеага гувоҳ бўлган бола қаттиқ қўрқиб кетганлиги ҳақида ИИБ ходимларига хабар берган. 

Сўнг юқоридаги ҳолат экспертлар томонидан ўрганилган. Уларга кўра, бундай ҳолатлар болаларда ҳайвонларнинг агрессив ҳаракатларини қабул қилишига, ўзини ва атрофдагиларни жароҳатлашига, ҳали тўла шаклланмаган психикасига зарар етишига ҳамда унинг жамиятдан ажратилиб қолишига олиб келиши мумкин. 

Ишки ишлар вазирлиги қайд этилган ёшларнинг мазкур хатти-ҳаракатларини тўхтатиш, яъни болаларнинг маъмурий ҳуқуқбузарлик содир этишини олдини олиш мақсадида ҳайвонга тақлид қилиб, уни ўзида шакллантирмоқчи бўлган болаларнинг ота-онасига жарима белгилади. 

"Маъмурий жавобгарлик тўғрисидаги кодексга мувофиқ, ота-оналар ёки уларнинг ўрнини босувчи шахслар томонидан вояга етмаган болаларни тарбиялаш ва уларга таълим бериш борасидаги мажбуриятларни бажармаслик, шу жумладан вояга етмаган болаларнинг маъмурий ҳуқуқбузарлик содир этишига олиб келиши БҲМнинг 5 баробаригача (1 миллион 875 минг сўмгача) жаримага тортишга сабаб бўлади", дейилади вазирлик хабарида.

Бундан ташқари, вазирлик бола ҳуқуқлари кафолатларини таъминлашга масъул органлардан бири сифатида шундай "субмаданият" намоён бўлиши ҳолатлари ота-оналар томонидан ўз мажбуриятларини бажармаслик сифатида баҳоланишини маълум қилган.