«Один дома 2» юлдузи Тим Карри 80 ёшида вафот этди

Актёрнинг вафоти ҳақида дастлаб TMZ хабар берди. Кейинчалик унинг менежери ҳам бу маълумотни тасдиқлади.

Тим Карри 1946 йил 19 апрелда Англиянинг Чешир графлигида туғилган. У профессионал фаолиятини театр саҳнасида бошлаган ва 1968 йилда Лондондаги «Hair» мюзикли постановкасида иштирок этган.

Каррига катта шуҳратни 1973 йилда саҳналаштирилган «The Rocky Horror Show» мюзиклидаги доктор Фрэнк-эн-Фёртер роли олиб келди. У 1975 йилда мазкур асарнинг фильм версиясида ҳам шу образни ижро этди. «The Rocky Horror Picture Show» кейинчалик культ фильмга айланиб, Каррининг энг машҳур ролларидан бири бўлиб қолди.

Пеннивайз образи билан ҳам машҳур бўлган

Карри 1990 йилда Стивен Кингнинг «Оно» романи асосида ишланган телевизион мини-сериалда Пеннивайз образини ижро этди. Унинг қўрқинчли масхарабоз талқини ушбу қаҳрамоннинг экрандаги энг машҳур образларидан бирига айланди.

Актёрнинг фильмографиясида «Легенда», «Подсказка», «Один дома 2: Потерявшийся в Нью-Йорке», «Анни» ва бошқа машҳур фильмлар ҳам бор.

«Один дома 2» фильмида Карри меҳмонхона консьержи мистер Хектор ролини ижро қилган.

Карри кино ва театрдан ташқари, овоз бериш соҳасида ҳам фаол ишлаган. У «Звёздные войны: Войны клонов», «The Wild Thornberrys» каби анимацион лойиҳаларда ва видеоўйинларда қаҳрамонларга овоз берган. Унинг фаолияти давомида бир нечта «Тони» мукофоти номинациялари ва «Эмми» мукофотига эга бўлган.

Инсультдан кейин ҳам ижодини давом эттирди

2012 йилда Тим Карри оғир инсультни бошдан кечирди. Шундан кейин унинг ҳаракатланиши чекланди ва у ногиронлар аравачасидан фойдалана бошлади. Шунга қарамай, актёр ижодий фаолиятини тўхтатмади ва асосан овоз бериш ишларида иштирок этди.

Карри 2025 йилда ўз хотираларини қамраб олган «Vagabond» номли мемуарини ҳам нашр этган. Ўша йили у «The Rocky Horror Picture Show» фильмининг 50 йиллигига бағишланган ҳужжатли лойиҳада иштирок этган.

Актёр 2026 йил 25 август куни Лос-Анжелесдаги Толука-Лейкда жойлашган уйида вафот этган. Унинг ўлим сабаби ҳозирча маълум қилинмаган.