Санъаткорлар тўй хизматлари учун солиқ тўлашдан норозими?

Ушбу ташаббус сўнгги кунларда ижтимоий тармоқларда кенг муҳокамага сабаб бўлиб, нафақат санъат аҳли, балки жамоатчилик эътиборини ҳам тортди.

Хусусан, Самандар Хамроқулов, Шароф Муқимов, Абдувосит Саримсоқов ҳамда Жафар Кенжаев ушбу масала юзасидан ўз муносабатини билдирди.

Санъаткорлар таъкидлашича, ташқи кўринишдаги дабдабали ҳаёт ҳар доим ҳам ҳақиқий ҳолатни акс эттирмайди. Кўплаб ижодкорлар ўйланганидек бой эмас, аксинча, айримларининг автомобиллари, уй-жойлари ва ҳатто саҳна либослари ҳам кредит асосида олинган.

Шунингдек, уларнинг асосий даромад манбаи айнан тўй ва турли маросимлардаги чиқишлар ҳисобланади. Қўшиқ ёзиш, клип суратга олиш каби ижодий жараёнлар катта маблағ талаб қилади ва бу харажатлар кўпинча шу хизматлар орқали қопланади. Айрим ижодкорлар эса бир неча йил давомида қарзларини узолмай, фойдасиз ишлаётганини ҳам айтмоқда.

Самандар Хамроқулов шундай дейди:
“Биз солиқ тўлашдан қочмоқчи эмасмиз, лекин ҳаётга реал кўз билан қарашни бошлашимиз керак.”

Жафар Кенжаев эса яна бир жиҳатга эътибор қаратиб, юқори гонорар оладиган санъаткорлар сабаб арзон ҳақ эвазига хизмат кўрсатадиганлар қийин аҳволга тушиб қолишини таъкидлади.

Санъаткорлар солиқ тизимига қарши эмаслигини билдирмоқда, бироқ соҳадаги барча иштирокчилар манфаатлари ҳам инобатга олиниши лозимлигини қайд этмоқда. Ҳозирча мазкур масала очиқ қолмоқда.

Муаллиф: Элнура Юсуфбекова