Сунъий интеллект ва журналистика: Беруний Алимовдан янги давр китоби

Ёшлар пресс клубида ташкил этилган мазкур тадбир журналистика ва замонавий технологиялар чорраҳасидаги долзарб масалаларни муҳокама қилишга бағишланди.

Монографияда сунъий интеллектнинг медиа соҳасига кириб келиши, унинг журналистик фаолиятга таъсири ҳамда келажакдаги истиқболлари кенг ёритилган. Муаллиф ушбу асари орқали журналистиканинг янги босқичга ўтаётганини илмий асосда таҳлил қилади.

Тақдимот давомида бир қатор таниқли олим ва мутахассислар ўз фикр-мулоҳазалари билан ўртоқлашди. Жумладан, медиа тадқиқотчиси Файзулла Мўминов ҳамда таниқли журналист ва ёзувчи Хуршид Дўстмуҳаммад китобнинг илмий ва амалий аҳамиятига тўхталиб, сунъий интеллектнинг журналистикадаги ўрни тобора ортиб бораётганини таъкидлашди.

Тадбир очиқ мулоқот руҳида ўтиб, ёш журналистлар учун муҳим саволларга жавоблар берилди. Иштирокчилар сунъий интеллект шароитида журналистиканинг масъулияти, ахборот ишончлилиги ва этик меъёрлар масаласида фикр алмашиш имконига эга бўлишди. 

Мазкур тақдимот ёшлар учун нафақат янги билим манбаи, балки келажак касбий йўналишларини белгилашда муҳим платформа бўлиб хизмат қилди.